विद्युतीय बसको सञ्चालन खर्च पाँच गुणा कम

काठमाडौं– जैविक इन्धनको तुलनामा विद्युत्बाट चल्ने सवारीसाधनको सञ्चालन खर्च पाँच गुणा कम हुने पाइएको छ । काठमाडौंको रिङरोडमा विद्युतीय बस चलाइरहेको सुन्दर यातायातका अनुसार विद्युतीय बस खरिद अरु बसभन्दा तुलनात्मक रूपमा महङ्गो भए पनि यसको सञ्चालन खर्च कम हुन्छ । कम्पनीले हाल हाल चक्रपथमा सञ्चालन गरिरहेका बसमा पेट्रोलियम पदार्थमा हुने खर्चभन्दा विद्युत् खपतवापत लाग्ने शुल्क पाँच गुणा कम हुने गरेको छ ।

डिजेलबाट चल्ने बस औसत छ पटक चक्रपथ घुम्दा दैनिक चार हजार रुपैयाँसम्म इन्धनमा खर्च हुन्छ । विद्युतीय सवारीसाधन चार्ज गर्दा भने महसुलवापत दैनिक झण्डै ७५० रुपैयाँमात्र खर्च हुने प्रालिका अध्यक्ष भेषबहादुर थापाले बताए । खरिद मूल्य बढी भए पनि सञ्चालन खर्च कम रहेकाले प्रालिले अहिले यात्रुबाट लिने भाडामा पनि सहुलियत दिइरहेको छ ।

उनले भने, “सरकारले सार्वजनिक यातायातका लागि निर्धारण गरेको भाडादरमा हामीले २० प्रतिशत छुट दिइरहेका छौँ ।” विद्युतीय सवारी साधन चार्ज गर्नका लागि बनाइएका निजी संस्थाले निर्माण गरेका ‘चार्जिङ स्टेशन’ लाई सहुलियत दिने सरकारले व्यवस्था गरेको छैन ।

‘चार्जिङ स्टेशन’ लाई सहुलियत दिँदा सञ्चालन खर्च कम हुने र यात्रुलाई अझै छुट दिन सकिने उनले बताए । दुई महिना पहिलेदेखि प्रालिले चार वटा विद्युतीय बस चक्रपथमा सञ्चालन गरिरहेको छ । यही वर्ष २५ बस थप्ने उक्त प्रालिको योजना छ ।

रासस