ओलीलाई उत्तराखण्डका मुख्यमन्त्रीको जवाफ : 'काला पानी हमारा है'

काठमाडौं - भारतसँगको सीमा विवादमा प्रधानमन्त्री केपी शर्मा ओलीको प्रतिक्रिया आएको २४ घण्टा नवित्दै भारतको उत्तराखण्डका मुख्यमन्त्री त्रिवेन्द्र रावतले जवाफ फर्काएका छन्।

आइतबार प्रधानमन्त्री ओलीले लिपुलेक, कालापानी नेपालकै भएको दाबी गर्दै भारतीय सेनालाई फिर्ता हुन आग्रह गरेका थिए। उक्त विषय भारतीय मिडियाहरुमा चर्चाको विषय बनेको थियो।

प्रधानमन्त्री ओलीको भनाईको खण्डन गर्दै उत्तराखण्डका मुख्यमन्त्री रावतले कालापानी भारतीय भूभाग भएको दाबी गरेका छन्। उत्तराखण्डको राजधानी देहरादुनस्थित गान्धी पार्कमा सोमबार आयोजित कार्यक्रममा मुख्यमन्त्री रावतले कालापानी भारतको भएको दाबी गरे।

प्रधानमन्त्री ओलीको भनाई दुर्भाग्यपूर्ण भएको बताउँदै रावतले नेपालमा केही गलत तत्वले प्रवेश पाएकोसमेत दाबी गरे। मुख्यमन्त्री रावतले छलफलको माध्यमले सीमा समस्या समाधान हुने समेत बताए।

यसैबीच भारतीय विदेश मन्त्रालयले पनि छलफलको माध्यमले नेपालको असन्तुष्टि समाधान गरिने बताएको छ।