सिन्धुपाल्चोक- असार १ गते आएको बाढीपहिरोले तहसनहस पारेको मेलम्ची बजार फोहोरले दुर्गन्धित बनेको छ। नगरपालिकाले निर्माण गरेको फोहोर प्रशोधन केन्द्र बाढीले बगाएपछि जथाभावी फोहोर फाल्नाले बजार दुर्गन्धित बनेको हो।
दुई महिनादेखि फोहोर नउठ्दा दुर्गन्ध फैलाएको छ। बजार क्षेत्रमा थुपारिएको फोहोर व्यवस्थापन नहुँदा दुर्गन्ध फैलिएसँगै सङ्क्रमणको त्रास बढेको छ। जताततै फोहोरैफोहोर भएकाले नाक, मुख थुनेर हिंड्नुपर्ने बाध्य रहेको स्थानीयवासीको भनाइ छ।
गर्मी समय भएकाले कुहिने फोहोरका कारण बजार क्षेत्र दुर्गन्धित बनेको छ। होटल, तरकारी पसल, किराना पसल तथा घरबाट निस्कने फोहोर व्यवस्थापन नहुँदा मेलम्चीका खहरे खोला र बजार आसपासका छेउछाउ फोहोरले भरिएका छन्।
बाढी आउनु पहिले कुहिने, नकुहिने, पुनः प्रयोग गर्न मिल्ने–नमिल्ने गरी बजार क्षेत्रमा जम्मा हुने फोहर संकलन गरी व्यवस्थापन गरिन्थ्यो। बाढी आउनु पूर्व नगरपालिकाको गाडीले हप्तामा २ पटक फोहोर उठाउने गरेको थियो।
फोहोर व्यवस्थापनका लागि नगरपालिकाले दीर्घकाली नसोचको र ठाउँको अध्ययन गरिरहेको नगरपालिकाका मेयर डम्बर अर्यालले बताए। बजार व्यवस्थापन समिति र स्थानीय तहले बेलैमा यो विषयमा सोच्नुपर्ने स्थानीयले बताएका छन्। -न्युजकारखाना