जनकपुरधाम- प्रदेश २ का प्रदेश प्रमुख तिलक परियारले अरुलाई गाली गरेर आफू चोखिने परम्परा अन्त्य गर्नुपर्ने बताएका छन् । आफू चोखिन अरुलाई गाली गर्ने बानिले मुलुक र प्रदेशको समृद्धि हुन नसक्ने जिकिर गरेका छन् ।
जनकपुरमा शनिबार आयोजित धनुषा च्याम्बर्स अफ कमर्सको प्रथम वार्षिकोत्सव एवं दोस्रो साधारणसभामा बोल्दै प्रदेश प्रमुख परियारले जनताले चुनेको प्रतिनिधिको हैसियतले आफैपनि काम गर्नुपर्ने आँट राख्न सुझाएका छन् ।
परियारअघि कार्यक्रममा बोलेका प्रदेश २ राजपाका प्रमुख सचेतक परमेश्वर साह र समाजवादी पार्टीका संसदीय दलका उपनेता रामअशिष यादवले प्रदेशप्रति संघीय सरकारको भेदभाव अझै कायम रहेको बताएका थिए ।
प्रदेश प्रमुख परियारले संघीयतालाई बुझ्न नसके प्रदेशले संघीय र स्थानीय तहले प्रदेश सरकारलाई गाली गरेर आफू चोखो हुने काममात्र गर्ने बताए ।
‘अरुलाई गाली गरेर आफू चोखिन सकित्र, समय परिवर्तन भइसकेको छ,’ उनले भने,‘जनताको प्रतिनिधिको हैसियतले आफुपनि केही गर्नसक्ने आँट राख्नुपर्दछ ।’
तराई, मधेश र हिमाललाई अलग बनाएर हेर्ने दृष्टिकोण परिवर्तन गर्नसमेत उनले आग्रह गरेका छन् । ‘नेपाल सबैको साझा मुलुक हो । तराई, मधेश र हिमाललाई छुट्टाछुट्टै हेर्ने दृष्टिकोण फेरिनु पर्दछ,’ परियारले थपे,‘दृष्टिकोण परिवर्तन नभए बाह्य शक्ति हावी हुने सम्भावना बढ्ेर जान्छ ।’
प्रदेश २ को सफलताको लागि सबै राजनीतिक शक्ति एक ढिक्का हुनुको विकल्प नरहेको उनको भनाइ थियो । केन्द्र र प्रदेश एक एकजुट भएर अगाडी बढेमात्र देशको विकास सम्भव रहेको परियारले बताए ।
राजपाका प्रमुख सचेतक परमेश्वर साहले संघीय सरकारको गलत नीतिका कारण अर्थतन्त्र धाराशायी अवस्थामा पुगिसकेको आरोप लगाए । प्रदेश २ ले पाँच खर्बभन्दा बढी राजश्व बुझाएपनि १५ अर्ब बजेटमात्र पाउनु दुर्भाग्यपूर्ण रहेको उनले उल्लेख गरे ।
यसैगरी समाजवादी पार्टीका संसदीय दलका उपनेता रामअशिष यादवले संघीय सरकारले उद्योगमैत्री वातावारण निर्माण गर्न नसक्दा उद्योगीहरु पलायनको अवस्थामा पुगेको बताए । बलियो अर्थतन्त्रका लागि संघीय सरकारले ठोस नीति ल्याउनुपर्ने उनको भनाइ थियो ।
च्याम्बर अफ कमर्सका केन्द्रीय वरिष्ठ उपाध्यक्ष राजेन्द्र मल्लले मुलुकमा लोकतन्त्र र गणतन्त्र आएपनि अर्थतन्त्र आउन नसकेको गुनासो गरे । १० वर्षभित्र व्यापार घाटा तीन गुणाले बढ्नु दुर्भाग्यपूर्ण अवस्था रहेको उनको भनाइ थियो ।
धनुषा च्याम्बर अफ कमर्सका अध्यक्ष विजयकुमार साहको अध्यक्षतामा सम्पत्र भएको कार्यक्रममा जनकपुरका पूर्व मेयर बजरंगप्रसाद साह, वरिष्ठ पत्रकार राजेश्वर नेपाली, कांग्रेस नेता मनोज साहलगायतका व्यक्तिहरुले सम्बोधन गरेका थिए ।