काठमाडौं - बंगलादेशमा जारी एसीसी इमर्जिङ एसिया कप क्रिकेटअन्तर्गत आफ्नो दोस्रो खेलमा नेपालले हङकङलाई जितका लागि २ सय १८ रनको लक्ष्य दिएको छ।
अघिल्लो चरण प्रवेशको सम्भावना जिवितै राख्न आजको खेल जित्नै पर्ने दबाबमा रहेको नेपालले निर्धारीत ओभरमा सम्पूर्ण विकेट गुमाउँदै २१७ रन जोडेको हो।
टस हारेर पहिले ब्याटिङ गरेको नेपालले खराब सुरुवात गर्यो। ओपनिङमा आएका नेपालका कप्तान ज्ञानेन्द्र मल्लले आजको खेलमासमेत निराशाजनक प्रदर्शन गरे। उनी २ बल खेल्दै शुन्य रनमा आउट हुँदा अर्का ओपनर कुशल भुर्तेल १ रनमा आउट भए। ३ रनमै दुई विकेट गुमाउँदै धर्मराएको नेपाली इनिङ्श उकास्ने क्रममा शरद भेषावकरले ८९ रन बनाए। उनले १३९ बलमा ९ चौका प्रहार गरे। शरद र दिपेन्द्रसिंह ऐरीले तेस्रो विकेटका लागि ८३ रनको साझेदारी गरे। दिपेन्द्रले ३७ रन बनाए। यस्तै नेपालका लागि महम्मद आशिफ शेखले ४२ रन बनाए। विनोद भण्डारीले १५ रन बनाउँदा करन केसी ७ रनमा आउट भए। हङकङका मोहम्मद अैजज खानले तीन तथा नसरुल्लाह राना र एहसान नवाजले समान २/२ विकेट लिए।
पहिलो खेलमा भारतको यू-२३ टोलीसँग ७ विकेटले पराजित भएपछि नेपाल दबाबमा परेको हो। दुबै टोलीले पहिलो खेलमा हार व्यहोरेका थिए। हङकङ पनि आयोजक बंगलादेशसँग ९ विकेटले पराजित भएको थियो।
नेपालले समूह चरणको अन्तिम खेल आयोजक बंगलादेशसँग सोमबार खेल्ने छ।