अर्थ समितिको बैठक दोस्रो पटक स्थगित

काठमाडौं - संघीय संसद अन्तर्गत अर्थ समितिको बैठक कोरम नपुगेपछि बिहीबार पनि स्थगित भएको छ।

बिहान ११ बजेका लागि सिंहदरबरमा बोलाइएको बैठकमा समितिका सदस्यहरुको गणपूरक संख्या नपुगेपछि दोस्रो पटक बैठक स्थगित भएको हो।

बैठकमा समितिका सभापति कृष्णप्रसाद दाहालले एक घण्टा कुर्दा पनि अन्य सदस्यहरुको उपस्थित नभएपछि बैठक स्थगित गर्नुपरेको समितिको सचिवालयले जनाएको छ।
बैठकका लागि समिति सदस्यहरु घनश्याम भुसाल, ज्ञानेन्द्रबहादुर कार्की, रामकुमार झाँक्रीलगायत भने निर्धारित समयमै पुगेका थिए।

समितिको यसअघि कात्तिक १९ गते बोलाइएको बैठकमा पनि कोरम नपुगेकै कारण स्थगित गरिएको थियो । बैठकका लागि ‘नागरिक लगानी कोष ऐन, २०४७ लाई संशोधन गर्न बनेको विधेयक’ माथि छलफल गर्ने कार्यसूची तय गरिएको थियो।