वसन्तपुरमा आजदेखि पार्किङ निषेध

काठमाडौं- वसन्तुरको डबली क्षेत्रमा सवारी पार्किङ गर्न रोक लगाइएको छ। ट्राफिक प्रहरी, जनप्रतिनिधि, नगर प्रहरी र हनुमानढोका दरबार क्षेत्र संरक्षण कार्यक्रम कार्यालयका प्रतिनिधिको वसन्तपुरमा बसेको संयुक्त बैठकले वसन्तपुरमा पार्किङ रोक लगाउने निर्णय गरेको हो।

काठमाडौं महानगरपालिका वडा नम्बर २३ का अध्यक्ष मचाराजा महर्जनले वसन्तपुर क्षेत्रमा बिहीबारबाटै पार्किङ निषेधको होडिङ बोर्ड राखिने जानकारी दिए। उनले पार्किङ निषेधमा कडाइ गर्न नगर प्रहरी परिचालनसमेत गरिने बताए।

उनले बैठकमा वसन्तपुर क्षेत्रमा दीर्घकालीनरूपले सवारी पार्किङ निषेध गर्ने योजनाबारे छलफल भएको जानकारी दिए। उनले भने, “अहिले विभिन्न संरचना बनिरहेको छ। सबै पूर्वाधार तयार गरिसकेपछि दीर्घकालीनरूपमा पार्किङ व्यवस्थापन गर्छाैं।”

विश्व सम्पदामा सूचीकृत क्षेत्रमा अनधिकृतरूपमा सवारी पार्किङ गरिएपछि सम्पदाप्रेमीले यसलाई हटाउनुपर्ने माग राख्दै आएका थिए। सम्पदाप्रेमी गणपतिलाल श्रेष्ठले विश्व सम्पदामा सूचीकृत क्षेत्रलाई पार्किङ स्थल बनाउन नहुने बताउँछन्।

महानगरीय ट्राफिक प्रहरी वृत्त जनसेवा, वसन्तपुरका इन्चार्ज गोविन्द रावत वसन्तपुर क्षेत्रमा पार्किङ गरेको पाइएमा कारबाही गरिने बताए।

जनशक्ति अभाव कम हुँदा पार्किङ अस्तव्यस्त भएको उनको भनाइ छ । उनले जनशक्ति बढाए र सबैले सहयोग गरे वसन्तपुरमा र्दीर्घकालीन रूपमा पार्किङ समस्या समाधान गर्न सकिने बताए। आकस्मिक सेवाका सवारीलाई भने प्रवेश गराइने उनले जानकारी दिए।