धनगढी - गौरीफन्टा नाकामा बेहोस पारेर लुटिएका दुई नेपाली मजदुरलाई प्रहरीले उद्धार गरेको छ।
भारतमा मजदुरी गरी घर फर्किरहेका कैलालीको गोदावरी नगरपालिका-१२ ओलानीका ३८ वर्षीय नवराज जोशी र घोडाघोडी नगरपालिका-७ लालपुरका ३५ वर्षीया गोपाल भाटको उद्धार गरिएको प्रहरीले जनाएको छ।
जिल्ला प्रहरी कार्यालय कैलालीका प्रवक्ता प्रहरी नायब उपरीक्षक दक्षकुमार बस्नेतले उनीहरु दुवैजनालाई गौरीफन्टा नाकाबाट उद्धार गरिएको जानकारी दिए।
जोशीको प्रहरीले र भाटलाई आफन्तले उद्धार गरेको हो। उनीहरु दुवैजना सेती प्रादेशिक अस्पतालमा उपचार गराएर घर फर्किसकेका प्रहरी नायब उपरीक्षक बस्नेतले जानकारी दिए।
उनका अनुसार एकजनाले संगै रहेका साथीले दिएको बिस्कुट र अर्कोले चिसो पेय पदार्थ खाएको बताएका छन्। उनीहरुको साथमा भएको सामान र नगद सबै लुटिएको प्रहरीले जनाएको छ।