जनकपुरधाम - जनकपुरमा संसदीय विकास कोषको पैसा दुरुपयोग भएको छ। धनुषा क्षेत्र नम्बर ३ का प्रतिनिधिसभा सदस्य राजेन्द्र महतोको कोषको पैसाले जनकपुरधाम उपमहानगरपालिका–२ स्थित बीच बाटोमै चापाकल गाडिएको छ।
कोषबाट राजपा नेपाल धनुषाका कार्यकर्ता रामचन्द्र पजियारले चापाकल गाड्ने योजना पाएका थिए। पजियारले आफ्नो घरअगाडि बीच सडकमै चापाकल गाडेपछि बटुवा र सवारीसाधन सञ्चालनमा कठिनाइ भएको छ ।
योजनाका उपभोक्ता समिति अध्यक्षसमेत रहेका पजियारले ठाउँ अभाव कारण बीच सडकमै चापाकल गाडेको बताएका छन्।
योजना कार्यान्वयन गर्नुपूर्व वडा र उपमहानगरपालिकासँग समन्वय गर्नुपर्ने भए पनि त्यसो नगरिएको वडा नम्बर २ का अध्यक्ष शिवकुमार साहले बताए। चापाकल गाड्नुपूर्व आफूहरुसँग कुनै समन्वय नभएको साहको भनाइ छ।
कोषको योजनाअन्तर्गत गाडिएका अधिकांश चापाकलमा शुद्ध खानेपानी नआएको स्थानीयवासीको गुनासो छ। योजनाअन्तर्गत जनकपुरभित्र १८ र ग्रामीण क्षेत्रमा ७५ वटा चापाकल गाडिएको बताइएको छ।