कालापानीबारे प्रधानमन्त्रीसँग आज जवाफ लिइने

काठमाडौं- प्रतिनिधिसभाको राज्य व्यवस्था समितिले कालापानीमा भारतले गरेको अतिक्रमणका विषयमा प्रधानमन्त्री केपीशर्मा ओलीसँग जवाफ मागेको छ ।

मिनि संसद्समेत भनेर चिनिने समितिले प्रधानमन्त्रीालाई आज (साेमबार) जवाफ दिन बैठकमा डाकेको हो । सीमाजस्तो संवेदनशील विषय भएकाले प्रधानमन्त्रीलाई बैठकमा बोलाइएको समिति सभापति शशि श्रेष्ठले बताइन् ।

नयाँ संविधानअनुसार प्रतिनिधिसभा गठनपछि प्रधानमन्त्रीलाई समितिको बैठकमा पहिलोपटक डाकिएको हो। प्रधानमन्त्रीसँगै गृहमन्त्री रामबहादुर थापा र भूमि सुधारमन्त्री पदमा अर्याललाई पनि बैठकमा बोलाइएको छ।

उनीहरुसँग नेपालले कालापानी क्षेत्र रक्षाका लागि सरकारले गरेको काम र सो क्षेत्र नेपालकै हो भन्ने प्रमाणका विषयमा जवाफ मागिने भएको छ ।

यस्तै अन्तर्राष्ट्रिय सम्बन्ध समितिले यसबारेमा छलफल गर्न र आवश्यक जानकारी लिन परराष्ट्रमन्त्री प्रदीपकुमार ज्ञवालीलाई बोलाएको छ।

नेपालको लिपुलेक, कालापानी, लिम्पियाधुरालाई समेत आफ्नो बनाएर भारतले राजनीतिक नक्सा निकालेपछि त्यसको जनस्तरबाट चर्को विरोध हुँदै आएको छ ।

नक्सामा भारतले नेपालको ३७२ वर्गकिमि क्षेत्रफल आफ्नो बनाएको छ । भारतले कालापानी क्षेत्र आफ्नो भएको दाबी गर्दै आएको छ भने नेपाल सरकारले त्यो नक्सा स्विकार्न नसकिने बताएको छ ।