काठमाडौं- पश्चिम रुकुमको मुसिकोटस्थित जिल्ला अदालतमा कार्यरत एक जना नायब सुब्बालाई अख्तियार दुरुपयोग अनुसन्धान आयोगको टोलीले घुस रकमसहित नियन्त्रणमा लिएको छ।
नायब सुब्बा रमेशकुमार खड्कालाई जग्गा दाखिला खारेज दर्ता पूर्जी उपलब्ध गराइदिए बापत सेवाग्राहीसँग १५ हजार घुस रकम माग गरिरहेको अवस्थामा पक्राउ गरेको आयोगका प्रवक्ता प्रदीपकुमार कोइरालाले जानकारी दिए।
जग्गा दाखिल खारेज दर्ता पूर्जी उपलब्ध गराउनु पर्नेमा नगराई पटक–पटक मोलमोलाई गरी ६० हजार घुस रकम मागेको र अन्तिम समयमा १५ हजार रुपैँया घुस नदिइकन कागजपत्र नदिने भन्ने सूचना सेवाग्राहीले दिएको आधारमा आयोगको टोलीले उनलाई पक्राउ गरेको प्रवक्ता कोइरालाले बताए।
खड्काले अदालतबाट फैसला भईसकेको मुद्दामा मालपोत कार्यालयलाई जग्गा दाखिल खारेज दर्ता पूर्जी उपलब्ध गराउनु पर्नेमा नगराई घुस रकम माग गरेको अख्तियारले जनाएको छ।
आयोगको कार्यालय सुर्खेतबाट खटिएको टोलीले खड्कालाई रुकुम पश्चिम मुसिकोट नगरपालिका–१ खलंगा स्थित राप्ती होटल एण्ड लज अगाडिबाट नियन्त्रणमा लिई अनुसन्धान गरिरहेको कोइरालाले जानकारी दिए।