काठमाडौं- प्रधानमन्त्री केपी ओलीले बोलाएको सर्वपक्षीय बैठक बालुवाटारमा सुरु भएको छ।
प्रधानमन्त्री निवास बालुवाटारमा सुरु बैठकमा भारतले नयाँ नक्सा सार्वजनिक गरेपछि चर्किएको सीमा विवादबारे छलफल हुनेछ। बैठकमा दलका शीर्ष नेता र केही विज्ञलाई बोलाइएको छ।
भारतको नक्सामा नेपालको कालापानी, लिपुलेक र लिम्पियाधुरा समेटिएपछि नेपालमा चर्को विरोध भइरहेको छ। सत्तारुढ नेकपा र प्रमुख प्रतिपक्षी कांग्रेसका युवा संगठनले आन्दोलन चर्काइरहेका छन्।
बैठकमा सत्तारुढ नेकपा अध्यक्ष पुष्पकमल दाहाल, कांग्रेस सभापति शेरबहादुर देउवा, नेकपा वरिष्ठ नेताद्वय झलनाथ खनाल, माधवकुमार नेपाल, समाजवादी पार्टीका संघीय परिषद् अध्यक्ष डा. बाबुराम भट्टराईलगायत सहभागी छन्।