धनगढी - धनगढी उपमहानगरपालिका-६ का सञ्जय रानासहित दुई जना ठगलाई पूर्पक्षका लागि कारागार चलान गरिएको छ। जिल्ला अदालत कैलालीका न्यायाधीश कृष्णप्रसाद नेपालको ईजलासले रानासहित धनगढी उपमहानगरपालिका-३ का रुद्रप्रसाद अधिकारीलाई कारागार चलान गर्न आदेश दिएको हो।
यस्तै वडा नम्बर ६ का कमल बहादुर बिक र रानाकी साली कल्पना दिवाकोटीलाई जनही तीन लाख ५० हजार धरौटीमा रिहा गर्न आदेश भएको जिल्ला अदालत कैलालीका तहसिलदार तथा सूचना अधिकारी नरबहादुर नेगीले बताए।
चारै जनालाई सोमबार नै जिल्ला अदालतमा पेश गरिएकोमा तीन दिनसम्म उनीहरुको बयान भएकोमा शुक्रबार मात्रै थुनछेक बहस भएको थियो। चारै जनामाथि ठगी, सरकारी कागजात किर्ते, हातहतियार खरखजना र संगठीत अपराधमा मुद्दा दर्ता गरी प्रहरीले अनुसन्धान थालेको थियो।
उनीहरु मध्ये तीन जनालाई भदौ १८ गते पक्राउ गरिएको थियो भने रानाकी साली केही दिनपछि पक्राउ परेकी थिइन्।