भारतसामु सरकार लाचार बन्यो : थापा

दाङ- राष्ट्रिय प्रजातन्त्र पार्टीका अध्यक्ष कमल थापाले भारतले जारी गरेको नयाँ नक्सा अस्वीकार्य भएको बताएका छन्। उनले कालापानी र लिपुलेक नेपालको अभिन्न अंग रहेको स्पष्ट पारे।

तुल्सीपुरमा आयोजित चुनावी कार्यक्रममा बोल्दै थापाले सरकारले तुरुन्तै कूटनीतिक पहल गरी समस्या समाधान गर्न सरकारलाई सुझाव दिए।

नेपाली भूमि कब्जा गर्नु आपत्तिजनक भएको उनको भनाइ छ। उनले विदेशी हस्तक्षेपमा सरकार मौन बस्न नमिल्ने भन्दै लाचारीपन र आत्मसमर्पणवादी मानसिकताले मुलुकको स्वाधीनताको रक्षा हुन नसक्ने ठोकुवा गरे।

उनले राष्ट्रियताको मुद्दा बोकेर दुई तिहाइ बहुमत प्राप्त गर्ने सरकार विदेशी हस्तक्षेपसामु निरीह, लाचार र कमजोर हुनु दुर्भाग्यपूर्ण भएको भन्दै स्वाधीनता रक्षाका खातिर कसैसँग सम्झौता हुन नसक्ने बताए।