नेपालले आज म्यानमारसँग खेल्दै

काठमाडौं- नेपाली राष्ट्रिय फुटबल टोली आज म्यानमारसँग खेल्दै छ।

कतारमा हुने फिफा विश्वकप फुटबल छनोट खेलिरहेको नेपालले म्यानमारसँग मैत्रीपूर्ण खेल्न लागेको हो। खेल म्यानमारको मन्डला थिरी स्टेडियमा नेपाली समय अनुसार अपरान्ह ४ः१५ बजे सुरु हुनेछ।

नेपालले सन् २००८ मा भएको एएफसी च्यालेन्ज कपमा म्यानमारसँग पहिलोपटक भेट गरेको थियो। नेपालले म्यानमारसँग मैत्रीपूर्ण खेल भने पहिलो पटक खेल्न लागेको हो।

भारतको हैदरावादमा भएको एफसी च्यालेन्ज कममा नेपाल म्यानमारसँग ३-० गोलले पराजित भएको थियो। तर, मैत्रीपूर्ण खेलमा नेपाल घरेलु टिमलाई पराजित गर्दै च्यालेन्ज कपको हारको बदला लिने योजनामा हुनेछ।

युवा खेलाडीको साथ पाएको नेपाल फिफा वरीयतामा आफूभन्दा बलियो म्यानमारलाई उसैको मैदानमा हराउने दाउमा हुनेछ। म्यानमारविरुद्धको मैत्रीपूर्ण खेलमा नेपालका लागि नियमित दुई सदस्य भने टोलीमा छैनन्।

कप्तान किरण चेम्जोङ भारतीय आइ लिग मिनेर्वा पञ्जावको प्रिसिजनमा व्यस्त रहँदा रोहित चन्द इन्डोनेसियाको आइ लिगमा व्यस्त छन्।

विश्वकप छनोटअन्तर्गत अवे खेल खेलिसकेको नेपालले पहिलो घरेलु खेलमा कुवेतसँग मंसिर ३ गते दशरथ रंगशालामा खेल्नेछ। यसअघि कुवेतसँग अवे खेलमा नेपाल ७–० को भारी गोल अन्तरले पराजित भएको थियो।

नेपाल ४ खेलमा ३ अंक जोड्दै समूहको चौंथो स्थानमा छ।