काठमाडौं - पाकिस्तानविरुद्धको दोस्रो टी-ट्वान्टी क्रिकेटमा अष्ट्रेलियाले विजयी भएको छ। मंगलबार सम्पन्न खेलमा अष्ट्रेलियाले पाकिस्तानले ७ विकेटले हराएको हो।
पाकिस्तानले जितका लागि दिएको १ सय ५१ रनको लक्ष्य अष्ट्रेलियाले १८ ओभर ३ बलमा ३ विकेटको क्षतिमा भेट्टायो।
अष्ट्रेलियाका लागि स्मिथले अविजित रहँदै ८० रन बनाए। उनले ५१ बलमा ११ चौका र १ छक्का प्रहार गरे। यस्तै बेन डेर्मोटले २१ तथा डेभिड वार्नरले २० रनको योगदान दिए।
पाकिस्तानका मोहमद इरफान, इमाद वासिम र मोहमद आमिरले समान १/१ विकेट लिए।
टस जितेर पहिले ब्याटिङ गरेको पाकिस्तानले निर्धारित २० ओभरमा ६ विकेट गुमाएर १ सय ५० रन बनाएको थियो।
पाकिस्तानका लागि इफ्तिखार अहमदले अविजित रहँदै ६२ रन जोड्दा कप्तान बाबर आजमले ५० रन बनाए। यस्तै मोहमद रिजवानले १४ तथा इमादले ११ रन बनाए। अष्ट्रेलियाका अस्टन अगरले २ तथा केन रिचार्ड्सन र पाट कमिन्सले समान १/१ विकेट हात पारे।
जितपछि तीन खेलको टी-ट्वान्टी सिरिजमा अष्ट्रेलियाले १-० को अग्रता बनाएको छ। यसअघिको पहिलो खेल वर्षाका कारण बीचमै रोकिएको थियो। अब तेस्रो तथा अन्तिम टी-ट्वान्टी खेल शुक्रबार हुनेछ।