काठमाडौं- घर निर्माण सम्पन्न प्रमाणपत्र बनाईदिएवापत सेवाग्राहीबाट पाँच लाख घुस लिँदै गर्दा पक्राउ परेका टोखा नगरपालिकाका ईन्जिनियरसहित ३ जनाविरुद्ध अख्तियारले विशेष अदातलमा मुद्दा दायर गरेको छ।
नगरपालिकाका ईन्जिनियर दिनेश कुमार पाठक, लेखापढी व्यवसायी जयराम तिमिल्सिना र लायन्स ईन्जिनियरिङ्ग कन्स्ट्रक्सन एण्ड कन्सल्टेन्सी प्रालिका सवईन्जिनियर प्रशान्त चौधरीविरुद्ध अख्तियारले सोमबार विशेष अदालतमा मुद्दा दायर गरेको प्रवक्ता प्रदीपकुमार कोइरालाले जानकारी दिए।
उक्त कार्य भ्रष्टचार निवारण ऐन,२०५९ को दफा ३ को उपदफा (२) को कसुर भएको सप्रमाण पुष्टि हुन आएको भन्दै अखितयारले चौधरीविरुद्ध भ्रष्टचार निवारण ऐन,२०५९ को दफा ३ को उपदफा (२) मा उल्लेख भए बमोजिम सोही ऐनको दफा ३ को उपदफा (१) र सोही दफा ३ उपदफा (१) को खण्ड (घ) बमोजिम जरिवाना र कैद सजाय माग दावी गरेको छ।
यस्तै पाठकले चौधरीमार्फत घुस लिन लगाएको हुँदा उक्त कार्य भ्रष्टचार निवारण ऐन, २०५९ को दफा ३ को उपदफा (१) को कसुर भएको सप्रमाण पुष्टि भएको भन्दै भ्रष्टाचार निवारण ऐन,२०५९ को दफा ३ को उपदफा (१) र दफा ३ को उपदफा (१) को खण्ड (घ) बमोजिम सजाय मागदावी गरिएको छ।