चलचित्र ‘जीवन काँडा की फूल’ चलचित्र कार्तिक २२ गतेबाट प्रर्दशनमा आउने भएको छ ।
साहित्यकार झमक घिमिरेद्वारा लिखित पुस्तक ‘जीवन काँडा की फूल’ माथि चलचित्र बनाइएको छ । निर्माण पक्षले फिल्मको ट्रेलर सार्वजनिक गर्दै कार्तिक २२ मा चलचित्र प्रर्दशन गरिने जनाएको छ ।
चलचित्रमा झमक घिमिरेको सानो उमेरको भुमिकामा अवस्था थापा र युवावस्थाको भुमिकामा रोजिता बुद्धाचार्यले अभिनय गरेका छन्।
‘जीवन काँडाकी फूल’ झमक घिमिरेको आत्मकथामा आधारित कृति हो । कृतिमा नेपाली समाजले शारीरिक दुर्बलतालाई हेर्ने दृष्टिकोण, अन्धविश्वास, विपन्न परिवारको अवस्थालाई समेटिएको छ ।
घिमिरेले जन्मेदेखि २०६५ सालसम्म देखे भोगेका पीडा, व्यथा, सन्त्रास, अत्यासलाई कृतिमा समावेश गरेकी छन् । जीवन काँडा की फूलले २०६७ सालमा मदन पुरस्कार प्राप्त गरेको थियो ।
चलचित्रका निर्माता विनोद विष्ट रहेका छन् । बद्री चौहान र उमेश सुवेदी निर्देशक रहेको चलचित्रमा झमकको बहिनीको भुमिका सारिका घिमिरेले निभाएकी छिन् ।
झमक घिमिरेको कथा रहेको चलचित्रमा झमक र प्रकाश सिवाकोटीको गीत, प्रकाशकै सङ्गीत रहेको गीतमा जुनु गौतमको स्वर रहेको छ ।
चलचित्र घिमिरेको जन्मस्थान धनकुटा, धरानको वीपी मेमोरियल अस्पताल र काठमाडौंमा छयाङ्कन गरिएको हो ।