मन्त्रिपरिषद् बैठक स्थगित, प्रदेश प्रमुख नियुक्तिमा विवाद

काठमाडौं- प्रधानमन्त्री केपी शर्मा ओलीले आइतबार साँझका लागि बोलाएको मन्त्रिपरिषद् बैठक स्थगित भएको छ।

सातै प्रदेशका प्रदेश प्रमुख नियुक्तिका लागि बोलाइएको मन्त्रिपरिषद् बैठक स्थगित भएको हो।

स्थगित हुनुको कारण भने नेकपाको आन्तरिक विवाद रहेको छ।

सातै प्रदेशमा प्रदेश प्रमुख नियुक्तिबारे पार्टीभित्रै कुरा नमिलेपछि मन्त्रिपरिषद् बैठक नै बस्न नसकेको नेकपा निकट स्रोतले जनाएको छ।

यसअघि नेपाली कांग्रेस नेतृत्वको सरकारले सातवटा प्रदेशमा प्रदेश प्रमुख नियुक्त गरेको थियो।

अहिले नेकपाको करिब दुई तिहाईको सरकार रहेको छ। साथै समाजवादी पार्टी पनि सत्ता साझेदारका रुपमा रहेको छ।

नेकपाभित्रै को को व्यक्तिलाई प्रदेश प्रमुख बनाउने र ककस्को व्यक्ति पर्ने भन्नेमा कुरा मिल्न सकेको छैन।

सोमबार बिहान नेकपाले आन्तरिक छलफल गरेपछि दिउँसो मन्त्रिपरिषद् बैठक बस्ने सम्भावना रहेको स्रोतको भनाइ छ।

सातवटै प्रदेशका प्रमुखलाई राष्ट्रपति विद्यादेवी भण्डारीले आइतबार नै पदमुक्त गरेकी थिइन्।