कोहलपुरका डिएसपीमाथि छानबिन गर्न समिति गठन

काठमाडौं- बाँकेको इलाका प्रहरी कार्यालय, कोहलपुरमा कार्यरत प्रहरी नायब उपरीक्षक (डिएसपी) हेमबहादुर शाहीमाथि छानबिन गर्न आइतबार समिति गठन गरिएको छ। प्रहरी आचरण उल्लंघन गरिएको भन्दै उनीमाथि छानबिन गर्न लागिएको हो। 

प्रदेश ५ प्रहरीले यसबारे छानबिन गर्न प्रहरी बरिष्ठ उपरीक्षक (एसएसपी) नरबहादुर केसीको संयोजकत्वमा पाँच सदस्यीय समिति गठन गरेको छ। समितिले १० दिनभित्र प्रतिवेदन बुझाउनुपर्नेछ। 

तरुण दल नेपालगन्ज नगर सभापति सन्दीपजंग शाहको कारबाट बरामद गरिएको हतियार डिएसपीले आफै राखेको उनीमाथि आरोप छ।  

गत शुक्रबार डिएसपी शाही नेतृत्वको टोलीले नेपालगन्जको नमस्ते भिलेज रिसोर्टमा पार्किङ गरी राखिएको बा१८च ४२११ कारमा लुकाई राखेको अवस्थामा अमेरिकन बुलेट पेस्तोलसहित तरुण दलका नेपालगन्ज नगर सभापति सन्दीपजंग शाहलगायत ६ जनालाई पक्राउ गरेको थियो।  

डिएसपीले आचरणविपरीतको कार्य गरेको भेटिए प्रहरी ऐन नियमावलीअनुसार कारबाही गरिने प्रदेश ५ प्रहरीले जनाएको छ ।