बुधबार, असार ३१, २०७७

समाचार

अग्‍नि सापकोटालाई सभामुख बनाउने सहमति

1579442716agni_sapkota.png

काठमाडौं– नेपाल कम्युनिस्ट पार्टी (नेकपा)का अध्यक्षद्वय केपी शर्मा ओली र पुष्पकमल दाहालबीच अग्नि सापकोटालाई सभामुख बनाउने सहमति भएको बुझिएकोे छ।

दुई अध्यक्षबीच प्रधानमन्त्री निवास बालुवाटारमा आइतबार बिहान झन्डै दुई घन्टा छलफल भएको थियो। अब ४ बजे बस्ने नेकपा सचिवालयको बैठकले सापकोटाको नाम अनुमोदन गर्ने सम्भावना छ।

वर्तमान उपसभामुख शिवमाया तुम्बाहाम्फेको सभामुखमा दाबी भए पनि दाहालको पहिलो रोजाई सापकोटा नै थिए।

सापकोटाविरुद्धको मुद्दा
सापकोटाविरुद्ध द्वन्द्वकालमा काभ्रेका अर्जुन लामाको हत्यामा संलग्न भएको आरोपमा परेको मुद्दा अझै विचाराधिन छ।

२०६२ वैशाख १६ गते तत्कालीन माओवादीको अपहरणमा परेका लामाको दुई महीनापछि शव फेला परेको थियो।

लामाकी पत्नी पूर्णिमाया लामाले उक्त घटनामा नेता सापकोटालाई समेत विपक्षी बनाइ जाहेरी दिएकी थिइन्।

तीन दिन अघिमात्रै १७ नागरिक अगुवाले अब बन्ने सभामुख अभियोग रहित र आम नागरिकले विश्वास गरेको व्यक्ति हुनुपर्ने भन्दै अपिल जारी गरेका थिए ।  

३ माघमा जारी गरेको अपिलमा भनिएको छ, ‘प्रतिनिधि सभाको सभामुख पदमा उम्मेदवार बन्न चाहने संसद सदस्य संविधान अनुसार उच्च नैतिक चरित्रवान हुनुका साथै सक्षम, जनस्तरले समेत कुनै गुनासो नगरेको तथा कुनै कानुनले अयोग्य नभएको, अभियोगरहित एवम् प्रतिनिधि सभालाई कुशल नेतृत्वका साथ अगाडि बढाउन सक्ने भनी नेपाली नागरिकले समेत विश्वास गर्न सक्ने हुनुपर्छ।’

सभामुख अभियोगरहित हुनुपर्छ: नागरिक अगुवाहरु (अपिलको पूर्ण पाठसहित)

प्रतिक्रिया दिनुहोस्