धनगढी - पूर्वपश्चिम राजमार्गस्थित कैलालीको बौनीयामा गरिएको सडक अबरुद्ध करिब ७ घन्टापछि खुलेको छ। बसको ठक्करबाट दुई बालकको मृत्यु भएपछि मृतकका आफन्त र स्थानीयले बिहान १० बजेदेखि अबरुद्ध पारेको राजमार्ग बेलुकी ५ बजे खुलेको हो।
ईलाका प्रहरी कार्यालय टीकापुरका प्रहरी नायव उपरीक्षक मनोहर भट्टले स्थानीय प्रशासन, महाकाली यातायात र पीडित पक्षबीच वार्ता जारी राखेर सडक खुलाएको जानकारी दिए।
महेन्द्रनगरबाट काठमाडौं गइरहेको ना ७ ख ६०४६ नम्बरको यात्रुवाहक बसले बर्दगोरीया गाउँपालिका–१ साझाचोकमा बिहीबार साँझ ठक्कर दिँदा बर्दगोरीया गाउँपालिका–१ का ८ वर्षीय अंशु चौधरी र घोडाघोडी नगरपालिका–८ का १२ वर्षीय लक्ष्मण चौधरीको उपचारको क्रममा मृत्यु भएको थियो।
दिनभर राजमार्ग अवरुद्ध हुँदा सयौं सवारी साधन तथा यात्रुहरु अलपत्र परेका थिए।
प्रकाशित: Dec 31, 2017| 18:23 आइतबार, पुस १६, २०७४