अमेरिका जान चाहनेको लर्को, एक महिनामा २१ हजार बढीले राहदानी बनाए 

काठमाडौं- अमेरिकी सरकारले अमेरिकामा स्थायी बसोबास गर्न पाइने डीभी (डाइभर्सिटी भिसा चिठ्ठा) का लागि आवेदन फारम खुलाएलगत्तै नेपालमा राहदानी बनाउनेको संख्या ह्वात्तै बढेको छ ।

अमेरीकाले यस वर्षबाट डीभी फारम भर्नका लागि राहदानी अनिवार्य गरेपछि एक महिनामै राहदानी बनाउनेको संख्या २१ हजार नाघिसकेको छ । 

शुक्रबार मकवानपुरका विशाल वाइवा पनि राहदानी लिन परराष्ट्रमन्त्रालय पुगेका थिए । ३३ वर्षीय वाइवाले डीभी आवेदनकै लागि राहदानी बनाएको बताए । त्यस्तै काठमाडौंकै आशिष श्रेष्ठले पनि रु. दश हजार तिरेर राहदानी बनाएका छन् । 

राहदानी विभागका सूचना अधिकारी तीर्थराज अर्यालका अनुसार असोज १५ गतेदेखि कार्तिक ८ गतेसम्म २१ जार ६७५ जनाले राहदानी बनाइसकेका छन् । दशैं र तिहारकोबीचमा मात्रै १९ हजार ८२० जनाले राहदानी बनाएको उनले जानकारी दिए । 

डीभी फारम भर्ने समय सकिनै लाग्दा अहिले भने राहदानी विभागमा घुँइचो केही कम भएको छ । डीभी चिठ्ठाका लागि आवेदन दिने म्याद कार्तिक १९ गतेसम्म तोकिएको छ । 

दैनिक ६ सयको हाराहारीमा राहदानी बनाउने विभागले चालु एक महिनाको अवधिमा दैनिक २ हजार भन्दा बढी राहदानी वितरण गरेको थियो । 

सूचना अधिकारी अर्याल भन्छन्, ‘राहदानी बनाउनुको कारण नसोधिने हुँदा डीभी चिठ्ठाकै लागि राहदानी बनाइएको हो भन्न त मिल्दैन, तर एक्कासी राहदानी बनाउनेहरुको संख्या बढ्नुले त्यस्तै संकेत गर्छ ।’ उसो त दशैं विदामा आफ्नो गृह जिल्ला गएकाहरुले त्यसबेला सिफारिस लिएर आउने हुँदा दशैंपछिको अवधिमा राहदानी बनाउनेको संख्या बढेको हुनसक्ने उनको अनुमान छ ।  

गोरखाबाट पासपोर्ट बनाउनकै लागि आएकी सीता आचार्य भन्छिन्, “जिल्लामा पाँच हजार रुपैयाँमै पासपोर्ट बनाउन सकिन्छ तर, एक महिनाको समय लाग्छ । डीभी भर्ने म्याद धेरै दिन बाँकी नरहेकाले १२ हजार रुपैयाँ तिरेर विभागबाटै राहदानी लिन आएकी छु ।’

सामान्यतया राहदानी बनाउन विभागले एक महिनाको समयावधि तोकेको हुन्छ । तर मानिसहरुलाई हतार भएको खण्डमा छिट्टै राहदानी बनाउने व्यवस्था छ । विभागका अनुसार ५ हजार रुपैयाँ तिरेर राहदानी बनाउने हो भने एक महिना लाग्छ । त्यस्तै १० हजार रुपैयाँ तिरेर तीन दिनमा राहदानी बनाउन सकिन्छ भने १२ हजार रुपैयाँ तिरेर दुई दिनमा र १५ हजार रुपैयाँ तिरे एक दिनमै राहदानी बनाउन सकिन्छ ।