काठमाडौं– प्रधानमन्त्री केपी शर्मा ओली अस्वस्थ भएका छन् ।
उपचारका लागि उनलाई ग्रान्डी अस्पताल लगिएको प्रधानमन्त्रीका प्रेस सल्लाहकार कुन्दन अर्यालले जानकारी दिए । उनका अनुसार प्रधामन्त्रीलाई नियमित स्वास्थ्य परीक्षणका लागि अस्पताल लगिएको हो ।
१२ वर्षअघि मिर्गौला प्रत्यारोपण गरेका प्रधानमन्त्री ओलीको स्वास्थ्यमा बेला बेला समस्या आउने गरेको छ ।
भारत र बैंककमा स्वास्थ्य परीक्षण गराउँदै आएका प्रधानमन्त्री ओली गत १८ साउनमा सिंगापुर गएका थिए। सिंगापुरमा उनको नेसनल युनिभर्सिटी अस्पतालमा उपचार भएको थियो।
स्वास्थ्य परीक्षण गराएर २७ साउनमा मात्रै स्वदेश फर्किएका प्रधानमन्त्री ओलीलाई ३० साउनमै समस्या देखिएपछि उनी फेरि भदौ ४ गते सिंगापुर प्रस्थान गरेका थिए। १६ दिन लामो सिंगापुर बसाइ सकेर प्रधानमन्त्री केपी शर्मा ओली २० गते स्वदेश फर्किएका हुन्।
ग्राण्डीमा प्रधानमन्त्रीको स्वास्थ्य सम्बन्धी विभिन्न परीक्षण भइरहेको बुझिए पनि उनलाई के भएको हो भन्ने अस्पतालले खुलाएको छैन ।
प्रकाशित: Dec 31, 2017| 18:23 आइतबार, पुस १६, २०७४