कमेरो खन्ने क्रममा पुरिएर किशोरीको मृत्यु

काठमाडौं- तिहारका लागि घर रङ्ग्याउन कमेरो खन्ने क्रममा पहिरो जाँदा रोल्पामा एक किशोरीको ज्यान गएको छ। बिहीबार बिहान गएको पहिरोमा २ महिला घाइते भएका छन्।

रोल्पा नगरपालिका–३ कमिरेधारामा कमेरो खन्ने क्रममा सुनिलस्मृति गाउँपालिका–५ की १८ वर्षीया पवित्रा सेनको घटनास्थलमै मृत्यु भएको हो। घटनामा सोही ठाउँका २२ वर्षीया भावना रोका र २३ वर्षीया सीता घर्ती घाइते भएको प्रहरीले जानकारी दिएको छ। 

भावनाको छातीमा र सीताको टाउकोमा चोट लागेको जिल्ला प्रहरी कार्यालय रोल्पाका प्रहरी नायव उपरीक्षक चित्रबहादुर गुरुङले जानकारी दिए। 
उनले प्रहरी चौकी सातदोबाटोको टोलीले घाइतेको उद्धार गरेहको गुरुङले जानकारी दिए।

कमेरो खानी रहेको उक्त स्थान निक्कै जोखिमयुक्त रहे पनि स्थानीयहरुले दसैं तिहारमा घर रंगाउने कमेरो सोही ठाउँबाट ल्याउँदै आएका छन्।