प्रधानमन्त्री आज बाकु जाँदै, भेनेजुयलाका राष्ट्रपतिसँग भेट्ने

काठमाडौं- प्रधानमन्त्री केपीशर्मा ओली आज (बिहीबार) अरजबैजानको राजधानी बाकु प्रस्थान गर्दैछन् । 

असंलग्न आन्दोलनको १८ औं शिखर सम्मेलनमा सहभागी हुन उनी बिहान ११ बजे त्यसतर्फ प्रस्थान गर्न भएका हुन् । शिखर सम्मेलनमा ओलीले शुक्रबार सम्बोधन गर्ने कार्यक्रम छ। 

नेपालको संविधानमा असंलग्नता सिद्धान्तलाई अंगीकार गरिएको छ। शीतयुद्धकालीन अवस्थामा अघि बढेको बाङडुङ सिद्धान्तको अपरिहार्यता अहिले पनि उस्तै रहेको प्रधानमन्त्री ओलीको भनाइ छ।

परराष्ट्रमन्त्री विदेशमन्त्रीस्तरीय बैठकमा सहभागी भई नेपालको धारणा राखिसकेका छन्। परराष्ट्रसचिव शंकरदास बैरागी जापानबाटै बाकु गएका छन्। असंलग्न मुलुकबीच द्वन्द्व चर्किरहेको विषयलाई नेपालले जोड दिँदै सहकार्य नै विकासको पहिलो कदम भनेको छ।

यसैबीच प्रधानमन्त्री ओलीले बाकुमा भेनेजुयलाका राष्ट्रपति निकोलस मडुरोसँग साइडलाइन भेटवार्ता गर्ने भएका छन् । 

भेनेजुयलाकै आग्रहमा प्रधानमन्त्री ओलीले मडुरोलाई भेट्न लागेका हुन्। ओली र मडुरोबीच शनिबार बिहान भेट हुने कार्यक्रम छ। वार्ताबारे प्रधानमन्त्री कार्यालयले स्पष्ट पारेको छैन।

केहि महिना अगाडी मडुरोको पक्षमा सत्तारुढ दल नेकपा अध्यक्ष पुष्पकमल दाहालले वक्तव्य निकालेपछि अमेरिकाले आपत्ति प्रकट गरेको थियो।

 भेनेजुयलाको विषयमा अमेरिकालाई चिढ्याएको भन्दै दलभित्रै विवाद भएको थियो। भेनेजुयलासँग नेपालको खासै सम्बन्ध नभए पनि विचारधाराका कारण भन्दै दाहालले विज्ञप्ति निकालेका थिए।

यस्तै ओलीले मडुरोसहित बंगलादेशका प्रधानमन्त्री शेख हसिना, भारतका उपराष्ट्रपति एम भेनकाई नायडुलगायतसँग भेटघाट गर्नेछन्।