बलात्कार पछि हत्या गर्ने युवकलाई २० वर्ष पछि नेपाल ल्याइयो

काठमाडौं - झापामा २० वर्ष पहिले एक युवतीको बलात्कारपछि हत्या गरेर अमेरिका बसेका एक युवकलाई अमेरिकामै पक्राउ गरेर नेपाल ल्याइएको छ।

झापा चन्द्रगढी–३ का ४२ वर्षीय लीलाराज गौतमलाई इन्टरपोल वाशिंटनको सक्रियतामा पक्राउ गरी बुधबार नेपाल ल्याइएको हो। गौतमलाई सन् २०१८ फेब्रुअरी १३ मा पक्राउ गरी अमेरिकाकै हिरासतमा राखिएको थियो।

नेपाल प्रहरीले गरेको निरन्तरको पत्राचारपछि अमेरिकी अध्यागमनका न्यायाधीशले सन् २०१८ सेप्टेम्बर ५ मा उनलाई नेपाल पठाउने आदेश दिएका थिए। सोही आदेश अनुसार उनलाई टर्कीस एयरबाट बुधबार काठमाडौं ल्याइएको प्रहरीले जनाएको छ।

गौतमसहित मनोज खड्का, सिताराम बस्नेतले चन्द्रगढी–३ की सन्धा राजवंशीलाई २०५७ साल असोज २९ गते बलात्कार गरी हत्या गरेका थिए। उनीहरुले बलात्कार पश्चात घाँटी च्यापेर हत्या गरी चालआलीको जंगल एक रुखमा युवतीको शव झुण्ड्याएका थिए। 

गौतमलाई जिल्ला अदालत झापाले २०५८ कात्तिक २१ गते सफाई दिएको थियो। उक्त फैसला उपर पुनरावेदन गर्दा २०५८ चैत २८ गते जिल्ला अदालतको फैसला सदर भएको थियो।
 
पुनरावेदन अदालत इलामको फैसलाविरुद्ध सर्वोच्चमा उजुरी दिइएको थियो। पछि सर्वोच्च अदालतेले २०६६ भदौ २९ गते गौतमसमेत तीनै जनालाई जन्मकैदको फैसला सुनाएको थियो।
 
गौतम त्यसबेला २०५७ कात्तिक १ गतेदेखि २०५८ साउन ३२ सम्म १० महिना हिरासत बसेका थिए। उक्त १० महिना कट्टा गरी १९ वर्ष २ महिना कैद गर्न सर्वोच्चले आदेश दिएको थियो।