अध्यागमनका १३ अधिकृतविरुद्ध मुद्दा दायर

काठमाडौं- अख्तियार दुरूपयोग अनुसन्धान आयोगले त्रिभुवन विमानस्थलका अध्यागमन अधिकृत कमलप्रसाद पराजुलीसमेत १३ जनाविरुद्ध विशेष अदालतमा मुद्दा दायर गरेको छ। 

आयोगले वैदेशिक रोजगारमा जान चाहने महिला तथा पुरुषलाई कतारलगायतका खाडी मुलुकमा ‘भिजिट भिसा’ मा प्रस्थान अनुमति प्रदान गरी विचौलियालाई सघाउ पुर्‍याएको अभियोग उनीहरूमाथि लगाएको छ।

त्रिभुवन विमानस्थल अध्यागमन कार्यालयका अधिकृतहरू मनहरि बराल, शैलेन्द्र केएम, तोरण पराजुली, चक्रबहादुर श्रेष्ठ, मनोजकुमार पोखरेल, जगदीशचन्द्र नेपाली, विजय सापकोटा, शैलेन्द्र ढकाल, पद्मप्रसाद बजगाईं, वीरसिंह भण्डारी, कम्प्युटर अपरेटरद्वय रोशन गौतम र भोजप्रसाद न्यौपानेसमेतले अध्यागमन प्रणालीमा अभिलेख नराखी २४८ जनाबाट प्रतिव्यक्ति १० हजार रूपैयाँका दरले २४ लाख ८० हजार रूपैयाँ बराबरको रकम उठाएको आरोपमा विशेष अदालतले हिजो मुद्दा दायर गरेको हो।

त्रिभुवन विमानस्थलका अध्यागमन अधिकृत कमलप्रसाद पराजुलीले कार्यालय समयमा रहेको अवस्थामा कम्प्युटरको नेटवर्क बन्द गरी शंकास्पद रूपमा दुई वटा मोबाइल फोनमार्फत लाइनमा रहेका महिला यात्रीलाई बोलाइ कागजातसमेत नहेरी प्रस्थान अनुमति दिएको आरोप छ। 

पराजुलीले प्रयोग गर्ने मोबाइल नम्बरको आधारमा प्राप्त हुन आएको ‘कल रेकर्ड’ तथा तथ्यहरू अध्ययन गर्दा उनले सोही कार्यालयमा कार्यरत अन्य अध्यागमन अधिकृतबीच ‘म्यासेज’ समेत आदानप्रदान गरेको र प्रस्थान अनुमति दिन मिलेमतो गरेको आयोगका प्रवक्ता प्रदीपकुमार कोइरालाले बताए। रासस