डीभी आवेदन खुलेपछि राहदानी लिनेको चाप  

काठमाडौं- डाइभर्सिटी भिसा (डीभी)को आवेदन फर्म खुलेसँगै राहदानी विभागमा राहदानी बनाउन आउनेको चाप बढेको छ।

राहदानी विभागले पछिल्लो समय राहदानी लिन आउने झन्डै पाँच गुणा बढेको जनाएको छ। अरुबेला दैनिक राहदानीका ८ सय आवेदक रहने गरेकोमा अहिले चार हजार पुग्ने गरेको विभागकाे भनाइ छ। 

विभागका अनुसार डीभी आवेदन खुल्नुअघि गत असोज १४ मा राहदानी आवेदन भर्नेको संख्या ४ सय ८१ थियो । तर, डीभी आवेदन खुलेपछि यसको संख्या ह्वात्तै बढ्यो । विभागका अनुसार कात्तिक ३ मा राहदानी आवेदकको संख्या २ हजार ६ सय ६२ पुगेको छ।

डिभी आवेदन गत असोज १५ गतेदेखि खुलेको छ। 

विभागका अनुसार एकतिहाइले एक दिनमै राहदानी बनाउन आवेदन भर्ने गरेका छन्। एक दिनमै राहदानी बनाउन १५ हजार रूपैयाँ शुल्क लाग्छ।