नेकपा-कांग्रेस बैठकमा जुटेन सहमति

काठमाडौं - सत्तारुढ नेपाल कम्युनिष्ट पार्टी (नेकपा) र प्रमुख प्रतिपक्षी दल नेपाली कांग्रेसका नेताहरुबीच भएको छलफलमा कुनै पनि सहमति जुट्न सकेन।

बालुवाटारस्थित प्रधानमन्त्री निवासमा भएको बैठकमा सत्य निरुपण तथा मेलमिलाप आयोगका पदाधिकारीको विषय र विधेयकका बारे टुंगो लगाउने प्रयास भएको थियो।

छलफलमा सभामुख चयनका विषयमा पनि छलफल भएको थियो। तर, कुनै पनि विषयमा सहमति जुट्न नसकेको नेकपा संसदीय दलका उपनेता सुवास चन्द्र नेम्वाङले जनाएका छन्।

उनका अनुसार सत्य निरुपण तथा बेपत्ता आयोगबारे बनेको विधेयकका बारेमा सामान्य छलफल मात्र भएको छ। सञ्चारकर्मीहरुसँग नेम्वाङले भने, ‘विधेयकका बारेमा सामान्य छलफल भयो। अरु खासै केही भएन। नेताहरु यो विषय कसरी टुंग्याउने भन्नेमा चिन्तित देखिनु भएको हो।'

बैठकमा कांग्रेसको तर्फबाट सभापति शेरबहादुर देउवा मात्र सहभागी भएका थिए।
 
देउवा थप छलफल आवश्यक रहेको भन्दै बैठकबाट बाहिरिएका थिए।

नेकपाबाट भने प्रधानमन्त्री केपी शर्मा ओली, अध्यक्ष प्रचण्ड, वर्षमान पुन र नेम्वाङ सहभागी थिए।

नेम्वाङले सभामुख चयनका विषयमा पनि कुरा उठाएका थिए। तर, त्यस विषयमा खासै छलफल हुन नसकेको उनले जनाए।