काठमाडौं–विकेटकिपर तथा ब्याट्सवुमन ज्योति पाण्डेको शानदार अर्धशतको मद्दतमा विराटनगर टाईटन्सले विजयी सुरुवात गरेको छ। वुमेन च्याम्पियन्स लिग (डब्लुसीएल) टी–२० क्रिकेट अन्तर्गत बिहीबार भएको खेलमा ललितपुर फाल्कोन्सलाई ४ विकेटले पराजित गर्दै विराटनगरले विजयी सुरुवात गरेको हो।
ललितपुरले दिएको १ सय २३ रनको मध्यम लक्ष्य पछ्याएको विराटनगरले १६ ओभरमा ६ विकेट गुमाउँदै लक्ष्य पुरा गरेको हो। विराटनगरको जितका लागि ज्योतिले ६५ रनको अर्धशतकीय पारी खेलिन्। उनले ४३ बलमा १० चौका र १ छक्का प्रहार गर्दै ६५ रनको अर्धशतकीय पारी खेलिन्। त्यस्तै सोनु खड्काले २६ बलमा २ चौका र १ छक्का प्रहार गर्दै २४ रनको योगदान दिइन्। अश्मिना कर्मचार्यले १२ रन जोड्दा अन्य खेलाडीले दोहोरो अंकसमेत छुन सकेनन्। ललितपुरका लागि सम्झना खड्काले २ तथा करुणा भण्डारीले एक विकेट लिइन्।
यसअघि टस हारेर पहिले ब्याटिङको निम्तो पाएको ललितपुरले निर्धारित २० ओभरमा ७ विकेट गुमाउँदै १ सय २२ रन जोडेको थियो। ललितपुरका लागि ममता चौधरीले सर्वाधिक २८ रन जोडिन्। उनले २४ बलमा ३ चौका प्रहार गर्दै २८ रनको योगदान दिएकी हुन्। त्यस्तै करुणा भण्डारीले २१ रनको योगदान दिँदा कृति सेन र सम्झना खड्काले अविजित रहँदै समान १३–१३ रन जोडिन्। विराटनगरकी सबनम राई र आरती बिडारीले एक-एक विकेट लिए।
प्रकाशित: Dec 31, 2017| 18:23 आइतबार, पुस १६, २०७४