महिला भलिबलको कप्तानमा अरुणा

काठमाडौं– नेपाली राष्ट्रिय महिला भलिबल टोलीको कप्तानमा अरुणा शाहीलाई चयन गरिएको छ। नियमित कप्तान विनिता बुढाथोकी टोली बाहिर रहेपछि नेपाल भलिबल संघले अरुणालाई महिला टोलीको कप्तानीको जिम्मा दिएको हो। 

अरुणाले बंगलादेशमा हुने एसियन भलिबल कन्फेडेरेसन (एभिसी) सेन्ट्रल जोन सिनियर महिला भलिबल च्याम्पियनसिपमा नेपाली टोलीको कप्तानी सम्हाल्ने छिन्। प्रतियोगिता कार्तिक २२ देखि २७ गतेसम्म चल्नेछ। त्यसपछि नेपाली टोलीले नेपालमै आयोजना हुने १३औं दक्षिण एसियाली खेलकुद (साग) खेल्ने छ। सागमा पनि टोलीको कप्तानी अरुणाले नै गर्ने सम्भावना बढेको छ। साग मंसिर १५ देखि २५ गतेसम्म हुनेछ। 

सेन्ट्रल जोन र सागको तयारीका लागि नेपाली राष्ट्रिय महिला टोली बुधबार थाइल्यान्ड जाँदै छ। वैदेशिक प्रशिक्षण तथा मैत्रीपूर्ण खेलका लागि थाइल्याण्ड जाने टोलीको मंगलबार विदाई समेत गरिएको छ।
 
नियमित कप्तान विनिता भने यस पटक राष्ट्रिय टिमको प्रारम्भिक चरणमै परेकी थिइनन्। विनिता हाल 'विच भलिबल'को राष्ट्रिय टिममा रहेकी छिन्।