मंगलबार, चैत १८, २०७६

समाचार

हत्या अभियुक्तलाई जन्मकैदको फैसला

हत्या अभियुक्तलाई जन्मकैदको फैसला

काठमाडौं– तनहुँमा एक जनाको हत्या अभियोगमा पुर्पक्षका लागि थुनामा रहेका तीन जना मध्ये दुई जनालाई जन्मकैदको फैसला सुनाइएको छ।
व्यास नगरपालिका–४ बाघभञ्ज्याङका रामबहादुर परियारको हत्या अभियोगमा पुर्पक्षमा रहेका तीन अभियुक्तमध्ये दुई जनालाई जिल्ला अदालतले जन्मकैदको फैसला सुनाएको हो।

हत्यामा संलग्न रहेका व्यास नगरपालिका–४ का भारती परियार र मङ्गलबहादुर दमैलाई जन्मकैद र सुकबहादुर परियारलाई जिल्ला न्यायाधीश दुर्गाप्रसाद ढुङ्गेलकोे इजलासले तीन वर्ष कैदको फैसला सुनाएको श्रेस्तेदार सुदर्शन खनालले जानकारी दिए।

२०६८ साउन ९ गते भारतीको योजनामा मङ्गलबहादुर र सुकबहादुरले रामबहादुरलाई शुक्लागण्डकी नगरपालिकाको दुलेगौडास्थित सेती नदीको पुलबाट धकेलेर हत्या गरेको अनुसन्धानबाट खुलेको थियो।

प्रहरीले अभियुक्तहरुलाई गत वर्ष पुस २९ गते पक्राउ गरेको थियो। हत्यामा संलग्न रहेका भारती मृतकका बुहारी र दमै भान्जा हुन्।

भारतीले सुकबहादुर र मङ्गलबहादुरलाई पाँच–पाँच हजार दिएर रामबहादुरको हत्या गर्न लगाएको अनुसन्धानबाट खुलेको प्रहरीले जनाएको छ ।

रामबहादुरको हत्या गरेपछि सुकबहादुर परियार भारततर्फ भागेका र मङ्गलबहादुर वैदेशिक रोजगारीको सिलसिलामा साउदी पुगेका थिए।

प्रतिक्रिया दिनुहोस्