काठमाडौं- भुटानमा जारी तेस्रो संस्करणको महिला साफ यू-१५ च्याम्पियनसिपअन्तर्गत आफ्नो दोस्रो खेलमा नेपाल बंगलादेशसँग पराजित भएको छ। भुटानको थिम्पुमा शुक्रबार भएको खेलमा नेपाल बंगलादेशसँग २-१ गोलले पराजित भएको हो।
साविक विजेता समेत रहेको बंगलादेशलाई जित दिलाउन शहिदा अक्तेर रिपा र शम्सुन्नाहरले एक-एक गोल गरे। नेपालका लागि अमिशा कार्कीले एक गोल फर्काइन्।
खेलको १२ औं मिनेटमा शहिदा अक्तेरले गोल गर्दै बंगलादेशलाई अग्रता दिलाएकी थिइन्। २५ औं मिनेटमा शम्सुन्नाहरले पेनाल्टीमा गोल गर्दै बंगलादेशलाई पहिलो हाफमा २-० को अग्रता दिलाइन्। पेनाल्टी क्षेत्रभित्र नेपाली खेलाडीले फाउल गरेपछि पाएको पेनाल्टी अवसरलाई सदुपयोग गर्दै शम्सुन्नाहरले गोलमा परिणत गरेकी हुन्।
नेपालका लागि खेलको ६४ औं मिनेटमा अमिशा कार्कीले एक गोल गर्दै नेपाली टोलीलाई खेलमा फर्काउने प्रयास गरिन्। तर, नेपालले थप गोल गर्न नसक्दा बंगलादेशसँग २-१ ले पराजित हुन पुग्यो। नेपालका लागि अमिशाले निकिता थोकरको लामो पासमा बललाई नियन्त्रण गर्दै करिब २४ यार्डबाट उत्कृष्ट गोल गरेकी हुन्।
जारी प्रतियोगितामा नेपालको यो दोसो हार हो। यसअघि नेपाल भारतसँग ४-१ ले पराजित भएको थियो। हारसँगै नेपाल प्रतियोगिताबाट लगभग बाहिरिएको छ। अब नेपालले लिगको अन्तिम खेल आयोजक भुटानसँग आइतबार खेल्ने छ।
प्रकाशित: Dec 31, 2017| 18:23 आइतबार, पुस १६, २०७४