प्रारम्भिक बयानमा महराले भने- रोशनीलाई बलात्कार गरेको छैन

काठमाडौं- प्रहरी हिरासतमा रहेका निवर्तमान सभामुख कृष्णबहादुर महराले रोशनी शाहीलाई बलात्कार नगरेको दाबी गरेका छन्।

सरकारी वकिलको रोहबरमा प्रहरीसमक्ष प्रारम्भिक बयान दिएका महराले शाहीमाथि बलात्कारको प्रयाससमेत नगरेको बताएका हुन्। बिहीबार सरकारी वकिलको कार्यालयमा प्रहरीले महराको बयान लिएको थियो।

बयानका क्रममा महराले शाहीको कोठामा गएको स्वीकार गरेका छन्। शाहीसँग पारिवारिक सम्बन्ध रहेकाले शाहीको घरमा आउने-जाने क्रम रहेको तर बलात्कारको प्रयास नभएको महराले बयान दिएका छन्।

महराको बयान सकिएको छैन । 

संघीय संसद् सचिवालयकी कर्मचारी शाहीले आफूमाथि महराले जबरजस्ती करणीको प्रयास गरेको भन्दै गत असोज १९ गते प्रहरीमा उजुरी दिएकी थिइन्। सोही आधारमा महरा आइतबार पक्राउ परेका थिए।

मंगलबारसम्म प्रहरीले महराविरुद्ध जिल्ला अदालत काठमाडौंमा मुद्दा दर्ता गराएपछि थुनछेक बहस हुनेछ। थुनछेक बहसपछि महराले हिरासतभित्रै रहेर मुद्दा लड्ने अथवा बाहिरबाट लड्ने विषय टुंगो लाग्नेछ।

बिहीबारको बयानपछि महरालाई नर्भिक अस्पतालमा राखिएको छ।