काठमाडौं- नेपालका उदयीमान खेलाडी प्रिन्स दाहाल लिनिङ दक्षिण एसियाली यु-२१ रिजनल ब्याडमिन्टन च्याम्पियनसिपको पुरुष एकलमा उपाधि नजिक पुगेका छन्। प्रिन्सले उपाधिका लागि प्रतियोगितामा तेस्रो वरीयताप्राप्त भारतका सराथ दुन्नानको सामना गर्ने भएका छन्।
दुबई इन्टरनेसनलका विजेतासमेत रहेका प्रिन्सले प्रतियोगितामा चौथो वरीयताप्राप्त श्रीलंकाका रन्थुस्का ससिन्दुलाई १६-२१, २१-१५ र २१-१८ ले पराजित गर्दै फाइनल यात्रा तय गरेका हुन्।
पुरुष एकलमै नेपाली खेलाडी प्रफुल महर्जन भने दुन्नानसँग क्वाटरफाइनलमा १८-२१, २१-१४ र २०-२२ को प्रतिस्पर्धात्मक खेलमा पराजित भए।
महिला एकलतर्फ भने नेपाली खेलाडी पहिलो चरणबाट नै बाहिरिए।
पुरुष युगलतर्फ प्रिन्स र प्रफुलको जोडी पाकिस्तानी खेलाडीसँग क्वाटरफाइनलमा पराजित भए। यसैगरी, महिला युगलमा रशिला महर्जन र जेशिका गुरुङको जोडी भारतीय खेलाडी दीपशिखा सिंह र मानषी सिंहको जोडीसँग क्वाटरफाइनलमा पराजित भएका थिए।
प्रतियोगितामा नेपाली टोलीले अहिलेसम्म तीन कास्य पदक पाएको छ।
प्रकाशित: Dec 31, 2017| 18:23 आइतबार, पुस १६, २०७४