जनकपुरमा प्लास्टिकमुक्त अभियान

जनकपुरधाम - जनकपुरमा प्लास्टिकमुक्त अभियान सुरु गरिएको छ। प्लास्टिकले निर्मित झोलालगायतका सामाग्रीका कारण वातावरणीय प्रदूषण बढेको भन्दै जनकपुरधाम उपमहानगरपालिकाले स्वच्छता अभियानअन्तर्गत प्लास्टिकमुक्त अभियान सुरु गरेको हो।

अभियानअन्तर्गत उपमहानगरपालिका कार्यालयले पछिल्लो दुई दिनमा १० हजारभन्दा बढी कपडाको झोला वितरण गरेको छ।
उपमहानगरपालिकाका मेयर लालकिशोर साहको नेतृत्वमा राम मन्दिर, राजदेवी मन्दिरलगायतको क्षेत्रमा व्यवसायीले प्रयोग गर्ने प्लास्टिकको झोला लिएर कपडाको झोला वितरण गरिएको छ।

स्वच्छता अभियानअन्तर्गत व्यवसायीका साथै पूजाआजा गर्न पुगेका श्रद्धालुबाट समेत प्लास्टिकको झोला लिई प्रदुषणमुक्त कपडाको झोला वितरण भएको छ।

चाडपर्वका बेला व्यवसायी र उपभोक्ताले झोलाको बढी प्रयोग गर्ने भएकोले प्लास्टिकबाट हुने वातावरण प्रदूषण रोक्न कपडाको झोला वितरण गरिएको मेयर साहले बताए् । अभियानअन्तर्गत प्रदूषणरहित झोला वितरण गरिएको उनको भनाइ छ ।

आइतबार राजेदेवी मन्दिर, राम मन्दिर क्षेत्रमा प्रदुषणमुक्त झोला वितरण गर्ने क्रममा जनकपुरका मेयर साहका साथै नेपाल समय मिडिया प्रालिका अध्यक्ष विश्वनाथ प्रसाद शाह, उपमहानगरपालिकाका पदाधिकारी, जनकप्रतिनिधिलगायतको सहभागिता थियो।