मंगलबार, असार २३, २०७७

समाचार कला - साहित्य

यस्ता छन् विश्‍वका उत्कृष्‍ट १० पुस्तक

1578036014books_(1).jpg

सन् २०१९ हामीबाट भर्खरै बिदा भएको छ। विश्वले २०१९ मा धेरै नयाँ कुरा पायो। विज्ञान र प्रविधिका क्षेत्रमा नयाँ–नयाँ आविष्कार भए। कला-साहित्यका क्षेत्रमा धेरै सिर्जना भए।

पुस्तक प्रकाशनका क्षेत्रमा पनि नयाँ आयाम थपिए। केही पुस्तकहरुले पाठकको मन जिते। यस्ता पुस्तक धेरैभन्दा धेरै बिक्री भए र विभिन्न पुरस्कारका लागि योग्य साबित भए। सन् २०१९ मा प्रकाशित विश्वका प्रमुख १० पुस्तक यस प्रकार छन्:

१. ब्ल्याक लियोपार्ड, रेड वुल्फ, मार्लोन जेम्स

मार्लोन जेम्स जमैकन आख्यानकार हुन्। उनको यो उनकाे चौथो उपन्यास हो।४९ वर्षीय जेम्स उत्तरऔपनिवेशिक लेखक हुन्।

बुकर पुरस्कार विजेता जेम्सको यो आख्यानको विषयवस्तु अफ्रिकी पूराकथाबाट प्रभावित छ।

‘ब्ल्याक लियोपार्ड, रेड वुल्फ’ मा इतिहास, मिथक र स्वैरकल्पनाको त्रिकोणात्मक कथा छ। हराएको बालकको खोजीका लागि भोग्नुपरेको सङ्घर्ष र बहादुरीको बयानले पाठकको ध्यान तान्छ।

२. फल्टर, बिल म्याकिबेन

म्याकिबेन अमेरिकी वातावरणविद्, लेखक र पत्रकार हुन्। म्याकिबेन मानिसलाई मौसम परिवर्तनबारे सचेत गराउने पहिलो व्यक्ति मानिन्छन्।

जलवायु परिवर्तनलाई मुख्य विषयवस्तु बनाइएकाे यो पुस्तकमा त्यसको असरले भावी पुस्तालाई पार्ने नकारात्मक असरबारे सजग गराइएको छ।

वातावरणीय सन्तुलन नभए मानव अस्तित्व नै धरापमा पर्ने उनको दाबी छ। ५९ वर्षीय म्याकिबेनले अमेरिका र क्यानडामा विभिन्न पुरस्कार पाएका छन्।

३. गर्ल, ओम्यान, अदर, बेर्नार्डिने एभरिस्टो

एभरिस्टो ब्रिटिस उपन्यासकार हुन्। गर्ल ओम्यान उनको आठाैँ उपन्यास हो।

उनी २०१९ को बुकर पुरस्कारका सहविजेता हुन्। यसमा विभिन्न पृष्ठभूमिका बेलायतका दर्जन महिलाका जीवनको गहिराइलाई बडो कलात्मक ढाँचामा प्रस्तुत गरिएको छ।

उपन्यासको कथानक अघि बढ्दै जाँदा उनीहरूको सम्बन्धमा पनि बिस्तारै परिवर्तन हुँदै जान्छ। जसले हामीलाई आश्चर्यको अवस्थातर्फ डोर्याउँछ।

यो बेलायतका काला नारीहरूको कथा हो। जसले नारीवाद र जातीयवादबारे गम्भीर प्रश्न खडा गरेका छन्। ६१ वर्षीया एभरिस्टो युरोपकै चर्चित नारीवादी लेखिका हुन्।

४. ए गुड प्रोभाइडर इज वान हु लिभ्स, जोसन डे पर्ल

पर्ल गरिबी र मानव विस्थापनबारे कलम चलाउने अमेरिकी पत्रकार हुन्। उनको प्रस्तुत कृति आख्यान हैन, तर आप्रवासनमा रहेका व्यक्तिले भोगेको कथा हो।

यसमा एक फिलिपिनो परिवारले दुनियाँभर चहार्दा बेहोरेको बहुआयामिक कथालाई बयान गरिएको छ। मनिलाबाट सुरु भएको यात्रा अबुधावी, गलभेस्टन, टेक्सस आदि धेरै ठाउँमा त्यो परिवारले भोगेको जीवन यसमा पाइन्छ।

यसलाई आप्रवासनबारे लेखिएको उत्कृष्ट कृति मानिएको छ।

५. नो माई नेम, चनेल मिलर

मिलर अमेरिकी लेखिका हुन्। सन् २०१५ मा स्ट्यानफोर्ड विश्वविद्यालयको एउटा क्याम्पसमा यौन दुर्व्ययवहार भएपछि उनी लेखनमा लागेकी हुन्।

२७ वर्षीया मिलर सन् २०१६ र २०१९ मा ग्ल्यामर्स महिलाको सूचीमा सूचीकृत भइसकेकी छन्। यो उनको एक संस्मरणात्मक कृति हो।

यसमा यौन दुर्व्यवहार र बलात्कारबाट पीडित मानिसलाई न्याय पाउन कत्तिको कठिन छ भन्ने विषयवस्तु उठाइएको छ।

साथै यो कृतिमा यौन हिंसामा परेका व्यक्तिले व्यक्त गरेको सहासिक बयान र भविष्यप्रतिको आशा प्रस्तुत छ। पुस्तकको पटकथा उच्चस्तरको छ।

६. अन अर्थ वी आर ब्रिफ्ली जर्जियस, वेसेन भोङ

भोङ भियतनामी मूलका अमेरिकी कवि, निबन्धकार र उपन्यासकार हुन्। भोङको यो पहिलो उपन्यास हो।

३१ वर्षीय भोङले सन् २०१७ मा कविताका लागि टीएस इलियट पुस्कार पाए। प्रस्तुत उपन्यासमा लेखकका जीवनका घटनालाई गहिरो गरी चित्रण गरिएको छ।

भियतनाम युद्धले कसरी जीवन समाप्त पारेको छ र कसरी बाँच्न सिकाएको छ भन्ने यथार्थमा यो उपन्यास आधारित छ। यसमा असाधारण पारिवारिक कथा, जोश र सौन्दर्यको त्रिवेणी पाइन्छ।

७. से नोथिङ, पेट्रिक राडेन किफ

किफ अमेरिकी लेखक तथा खोज पत्रकार हुन्। ‘से नोथिङ’ उत्तरी आयरल्यान्डको हत्या र स्मृतिको सत्य कथा हो।

उत्तरी आयरल्यान्डमा सन् १९७२ मा एउटी आमालाई उनीहरूको सन्तानबाट खोसेर ब्रिटिसहरूले कसरी यातना दिए भन्ने घटनालाई बडो रोचक ढाँचामा प्रस्तुत गरिएको छ।

८. स्ट्रेन्जर्स एन्ड काजन, लिहा हेगर कोहेन

कोहेन आख्यान र गैरआख्यानमा नाम कमाएकी अमेरिकी लेखिका हुन्। उनका ६ वटा उपन्यास प्रकाशित छन् भने ५ वटा गैरआख्यान कृति प्रकाशित छन्।

उनी साङ्केतिक भाषामा समेत विज्ञ छिन्। उनको प्रस्तुत उपन्यास पढ्दै जाँदा विभिन्न तर्कहरु आउँछन्।

बीचबीचमा पाठक नै उत्तेजक बन्न पुग्छ। साथै उपन्यासको कथावस्तु हास्य रसले युक्त छ। एउटा परिवारको कथाबाट आरम्भ हुने यसको कथावस्तु ज्यादै रोचक छ।

यहुदी परिवारलाई परेको प्राकृतिक विपत्तिको वर्णन छ यसमा। उपन्यास पढ्दा पाठकलाई जति गम्भीर बनाउँछ, त्यति नै आनन्द दिलाउँछ। उपन्यासमा कोमल भाषाको प्रयोग छ।

९. दि टोपेका स्कुल, बेन लर्नर

यिनी अमेरिकी कवि, उपन्यासकार, निबन्धकार र समालोचक हुन्। ४० वर्षीय लर्नरको ‘दि टोपेका स्कुल’ निकै चाखलाग्दो उपन्यास हो।

समीक्षकहरुले यसलाई विरलै सिर्जना हुने उपन्यास भनेका छन्। एउटा सानो सहरको कथा हो, जसले सम्पूर्ण देशको अवस्थालाई चित्रण गरेको छ। कथा बहुत नाटकीय छ।

जोखिमपूर्ण घटनाको बयान छ पुस्तकमा। पात्रको वाक्पटुताले उपन्यासलाई निकै आकर्षक बनाएको छ। यो १९९० को दशकमा क्यान्सासमा भएको एउटा स्कुलमा भएको बहसमा आधारित छ।

१०. द यल्लो हाउस, साराह एम बुम

४० वर्षीया अमेरिकी लेखिका सराहको द यल्लो हाउस पहिलो कृति हो। यो आत्मकथा हो। यसमा न्यु अल्र्यान्स सहरको एउटा घर लेखकले बिताएका क्षणहरुको बयान छ।

श्रमिक वर्गको आशा र गर्वको प्रस्तुति छ। त्यो सहर जहाँ पर्यटक घुम्न जाँदैनन्। कृतिमा गरिब, अश्वेत र श्रमिक वर्गको पीडा छ। विस्थापितको कथा छ।

जातिवादले निम्त्याएको अन्योलले मानिसलाई कसरी विभेद गर्छ भन्ने कुरा खुलाइएको छ।

–दि वासिङ्टन पोस्टबाट

प्रतिक्रिया दिनुहोस्