धनगढी- दार्चुलामा पहिरोमा पुरिएर एक जनाको मृत्यु भएको छ। पहिरोमा पुरिएर २ जना बेपत्ता भएका छन्।
आइतबार राति सुतिरहेकै अवस्थामा घरमाथिबाट खसेको पहिरोमाल पुरिएर दुहूँ गाउँपालिका–१ बस्पाली बस्ने नरसिंह महराको मृत्यु भएको छ भने उनकी श्रीमती कौशी देवी महरा बेपत्ता भएकी छन्।
सोही गाउँपालिकाको वडा नम्बर-५ दुल्लामा बाढीले मनुवा डँडाल बेपत्ता भएका छन्। कालागाड खोलामा राति १० बजेतिर आएको बाढीले घरसहित बगाउँदा उनी बेपत्ता भएका हुन् भने उनकी श्रीमती उजली डडाल र छिमेकी जनक राम पार्की घाइते भएको जिल्ला प्रहरी कार्यालय दार्चुलाले जनाएको छ।
वडा नम्बर ३ नबर निजमगाडमा बाढीले दुई जना बेपत्ता छन्। निजमगड खोलाको बाढीले स्थानीय शेरसिंह कार्की र हर्क सिंह कार्कीलाई बगाएको हो। कार्की दाजुभाइले पसल सञ्चालन गर्दै आएका थिए।
स्थानीय भोजराज जोशीका अनुसार सोही बाढीले दार्चुला–तिंकर सडक मोटरेबल पुल, दुई झोलुंगे पुल र एउटा पसल बगाएको छ। पुल बग्दा दुहूँ र व्यास गाउँपालिकाको सम्बन्ध विच्छेद भएको छ।
निजमगाड खोलाकै बाढीले महाकाली नगरपालिका–१ सिरिबगरका तीन वटा घर र एउटा पसल बगाएको छ। सेना, प्रहरी र स्थानीय बासिन्दा मिलेर बेपत्ताहरूको खोजी गरिरहेका छन्।
जिल्ला प्रहरी कार्यालय दार्चुलाका प्रमुख प्रहरी नायव उपरीक्षक मनोहरप्रसाद भट्टसमेत घटनास्थलतर्फ गएका छन्।