काठमाडौं– सातौं विश्व सैनिक खेलकूद प्रतियोगितामा नेपाल पहिलो पटक सहभागी हुने भएको छ।
इन्टरनेशनल मिलिट्री स्पोर्टस् काउन्सिलले प्रत्येक चार वर्षमा आयोजना गर्दै आएको प्रतियोगिता यस वर्ष चीनको उहानमा कात्तिक १ देखि १० गतेसम्म हुँदैछ।
प्रतियोगितामा विश्वका १०५ मुलुकका १० हजार ७१९ सैनिक खेलाडी सहभागी हुने छन्। दुई प्रदर्शनी खेलसहित २७ खेलमध्ये नेपाली सेनाले १३ खेलमा भाग लिनेछ।
नेपाली सेनाको सैनिक शारीरिक तालिम तथा खेलकुद केन्द्रका प्रमुख महासेनानी शशी किरण रायमाझीका अनुसार नेपाली सेनाले आर्चरी, ब्याडमिण्टन, बक्सिङ, घोडचढी, फेन्सिङ, जुडो, ट्रायथलन, ट्रयाक एण्ड फिल्ड, तेक्वान्दो, बिच भलिबल, कुस्ती, मोर्डन पेन्टाथलन र सुटिङ खेलमा भाग लिनेछ।
सेनाले छनौट भएका खेलाडीहरुलाई १५ महीनादेखि अभ्यास गराइरहेको छ।
रायमाझीका अनुसार प्रतियोगितामा भाग लिने ४० जना खेलाडी र प्रशिक्षकसहितको नेपाली प्रतिनिधिमण्डल असोज २५, २८ र २९ गते त्यसतर्फ प्रस्थान गर्नेछ ।
उक्त खेलकूद प्रतियोगिताको उद्घाटन समारोहमा उपप्रधानमन्त्री एवं रक्षामन्त्री ईश्वर पोखरेल समेत सहभागी हुने रायमाझीले जानकारी दिए।
प्रकाशित: Dec 31, 2017| 18:23 आइतबार, पुस १६, २०७४