त्रिकोणात्मक टी-२० सिरिज : नेपाल र सिंगापुर भिड्दै

काठमाडौं - सिंगापुरमा जारी त्रिकोणात्मक टी-२० सिरिज क्रिकेटमा आज (शनिबार) नेपालले आयोजक सिंगापुरको सामना गर्दै छ। पहिलो खेलमा टेस्ट राष्ट्र जिम्बाब्वेसँग पराजित भएको नेपालले आफ्नो दोस्रो खेलमा सिंगापुरको सामना गर्न लागेको हो। 

खेल नेपाली समय अनुसार साँझ ५:१५ बजे सुरु हुनेछ।

घरेलु टिमविरुद्ध मैदान उत्रदा नेपाल पहिलो जितको खोजीमा हुनेछ। सिरिजको फाइनलमा पुग्न नेपाललाई जित आवश्यक छ। नेपालले सिंगापुरसँग दुई महिनाअघि उसैको घरेलु मैदानमा भएको आईसीसी टी-२० विश्वकप एसिया छनोट खेलेको थियो। जसमा नेपाल पराजित भएको थियो। त्यसैले नेपाललाई उक्त हारको बदला लिने अवसर समेत रहेको छ। 

एसिया छनोटमा नेपाल सिंगापुरसँग ८२ रनले पराजित भएको थियो। जसको कारण नेपाल ग्लोबल छनोटमा पुग्न असफल भएको थियो। यता घरेलु टौली सिंगापुर पहिलो खेलमा जित निकाल्दै सिरिजमा सुखद सुरुवात गर्न चाहन्छ। 

डबल राउण्ड रोबिनको आधारमा जारी सिरिजको अंक तालिकामा नेपाल अंक विहिन रहेको छ। जिम्बावे २ अंक जोडेर शीर्ष स्थानमा छ। सिरिजको पहिलो खेलमा जिम्बाब्वेले नेपाललाई ५ विकेटले पराजित गरेको थियो।