सुर्खेत- सल्यानमामा तरकारी बोकेको पिकअप भ्यान दुर्घटना हुँदा एक जनाको मृत्यु भएको छ भने ६ जना घाइते भएका छन् ।
मृत्यु हुनेमा कपुरकोट गाउँपालिका वडा नं ४ किमुचौरकी ६७ वर्षीया कर्नी पुन रहेको जिल्ला प्रहरी कार्यालय सल्यानले जनाएको छ ।
पुनको उपचारका क्रममा राप्ती प्रादेशिक अस्पताल तुलसीपुर दाङमा शुक्रवार बिहान २ बजेतिर मृत्यु भएको हो ।
त्यस्तै घाइतेहरुको अवस्था पनि गम्भीर रहेको प्रहरीको भनाई छ । घाइते हुनेहरुमा कपुरकोट ४ किमुचौरकै ६८ महिनी पुन, ५३ वर्षीय लोकबहादुर घर्ती, ५३ वर्षकै टिकाराम घर्ती, २४ वर्षीया कृष्णा घर्ती, ४३ बर्षीय तिलक पुन र ३७ बर्षीय देबबहादुर पुन रहेका छन् ।
घाइते सबैको प्रादेशिक अस्पताल तुलसीपुरस्थितमा उपचार भइरहेको छ ।
सल्यानका प्रमुख डिएसपी ढकेन्द्र खतिवडाले किमुचौरबाट तरकारी लिएर कपुरकोटतर्फ आउँदै गरेको लु १ च ४१५३ नम्बरको पिकअप भन्यान शुक्रबार बिहान एक बजे किमुचौरमा दुर्घटना भएको थियो ।
आज कपुरकोटमा लाग्ने हाटबजारको लागि उनीहरु पिकपमा तरकारी लोड गरेर राति नै हिडेका थिए ।
गाडी सडकदेखि सय मिटर तल खसेको छ भने चालक र सहचालकलाई प्रहरीको नियन्त्रणमा लिएको डिएसपी खतिवडाले बताए । घटनाको बारेमा अनुसन्धान भैरहेको उनको भनाइ छ ।
प्रकाशित: Dec 31, 2017| 18:23 आइतबार, पुस १६, २०७४