काठमाडौं – डिफेन्डिङ च्याम्पियन नेपाल यू–१८ साफ च्याम्पियनसिप फुटबलको समूह चरणबाटै बाहिरिएको छ।
हलचोकस्थित एपीएफ मैदानमा मंगलबार भएको समूह ‘ए’ को अन्तिम खेलमा भुटानले माल्दिभ्ससँग गोलरहित बराबरी खेलेपछि नेपाल समूह चरणबाटै बाहिरिएको हो। भुटान र माल्दिभ्सले बराबरी खेलेसँगै भुटान समूह विजेता र माल्दिभ्स उपविजेता हुँदै सेमिफाइनलमा प्रवेश गरेका छन्।
भुटानले दुई खेलबाट चार अंक जोड्यो भने माल्दिभ्सले दुबै खेल बराबरी खेल्दै दुई अंक जोड्यो।
नेपालले माल्दिभ्ससँग १–१ को बराबरी खेलेको थियो भने भुटानसँग ३-० को लज्जास्पद हार व्यहोरेको थियो।
प्रतियोगिताको सेमिफाइनल समीकरण भने बुधबार पूरा हुँदैछ। समूह ‘बी’ को समूह चरणको अन्तिम खेलमा बुधबार भारतले श्रीलंकासँग दिउँसो ३ बजे प्रतिस्पर्धा गर्दैछ।
प्रकाशित: Dec 31, 2017| 18:23 आइतबार, पुस १६, २०७४