रुट परमिट बिना नै एक साता चल्दै सार्वजनिक यातायात 

काठमाडौं - दसैंलाई मध्यनजर गर्दै यातायात व्यवस्था विभागले एक साता रुट परमिटविना नै सार्वजनिक सवारीसाधन सञ्चालन गर्न दिने भएको छ। दसैंमा यात्रुको आवतजावतलाई ध्यान दिँदै विभागले असोज १२ देखि १९ गतेसम्म रुट परमिट विना नै सवारी सञ्चालन गर्न दिने व्यवस्था गरेको हो।

विभागका महानिर्देशक गोगनबहादुर हमालले दसैंमा सवारी साधन र यात्रुको चापलाई ध्यान दिँदै एक सातासम्म सार्वजनिक यातायात रुट परमिटविना नै सञ्चालन हुन पाउने व्यवस्था गरेको जानकारी दिए। यो व्यवस्था लागू भएपछि कालो नम्बरप्लेट भएका सबै सवारी साधनले जुनसुकै स्थानमा पनि जान पाउने भएको उनले बताए।
 
यो व्यवस्थाले धेरै यात्रु पाइने तराई क्षेत्र र कम यात्रु पाइने पहाडी क्षेत्र सबैतिरका यात्रुलाई एकनासले यातायात सेवामा पहुँच पुग्ने विश्वास हमालले व्यक्त गरे।  ‘यात्रुको चाप र सवारी साधनको अवस्थालाई हेरेर १९ गतेपछि पनि फ्रि रुट परमिटको व्यवस्था गर्न सकिने छ’, हमालले भने। 

साथै हमालले १२ देखि १९ गतेसम्म काठमाडौं भित्रिने मल्टि एक्सेल (१४ चक्केभन्दा ठूला) सवारी साधन प्रवेशमा रोक लगाइएको जानकारी दिए। काठमाडौं भित्रिने त्यस्ता सवारी साधनलाई चितवनको नारायणगढमा पार्किङ गरी राख्नुपर्ने र १९ गतेपछि मात्र सञ्चालन गर्न पाउने गरी प्रदेश ३ का सम्बन्धित ट्राफिक प्रहरी कार्यालयलाई परिपत्र गरिएको विभागले जानकारी दिएको छ। दसैंको समयमा उपत्यकाबाट २० लाख बढी यात्रु बाहिरिने विभागको आँकलन छ।