प्रदेश– २ मा सरकारको दीपावली, राजपाको विरोध प्रदर्शन

जनकपुरधाम–  संविधान दिवसको अवसरमा प्रदेश २ सरकारले तीन दिनसम्म विभिन्न कार्यक्रमको आयोजना गरेको छ भने सरकारमै सहभागी राजापले विरोध प्रदर्शन गरेको छ ।

तीन दिनसम्म विभिन्न कार्यक्रम गरी संविधान दिवस मनाउने निर्णय गरेको प्रदेश सरकारलदे शुक्रबार बिहान प्रभातफेरी निकालेको हो ।

यद्यपि प्रभातफेरीमा प्रदेश सरकारका मुख्यमन्त्री र मन्त्रीहरु सहभागी भएनन् ।

प्रभातफेरीमा विभित्र मन्त्रालयका कर्मचारी, नेपाल प्रहरी, सशस्त्र प्रहरी, नेपाली सेनालगायतको सहभागिता थियो ।

जानकी मन्दिरको प्राङ्गणबाट निकालिएको प्रभातफेरी जनक चोक, शिवचोक, भानुचोकहुँदै नगरको विभित्र क्षेत्र परिक्रमा गरी मधेश भवन (मुख्यमन्त्री तथा मन्त्रिपरिषद्को कार्यालय) पुगेर सम्पन्न  भएको थियो ।

यसअघि मुख्यमन्त्री तथा मन्त्रिपरिषद् कार्यालयमा नेपाली सेनाको टुकडीले सलामी दिएर झण्डोत्तलन गरेको थियो ।

संविधान दिवसको अवसरमा प्रदेश सरकारले विहिबार जनकपुरको जिरोमाइलदेखि बसपार्क क्षेत्रमा सरसफाइ कार्यक्रम गरेको थियो भने शनिबार मधेश भवनमा वृक्षारोपण गर्ने कार्यक्रम तय गरेको छ ।

प्रदेश सरकारको संविधान दिवस मुल समारोह समितिको आयोजना गरिएको प्रभातफेरी कार्यक्रममा सहभागी हुन सबै मन्त्रीहरुलाई पत्राचार गरिए पनि कोही सहभागी नभएको आन्तरिक मामिला तथा कानुन मन्त्रालयका एक कर्मचारीले बताए ।

‘कार्यक्रममा सहभागी हुन हामीले सबै मन्त्रीज्यूहरुलाई पत्राचार गरेका छौं । तर, किन आउनु भएन हामीलाई जानकारी छैन,’ ती कर्मचारीले भने ।

यता प्रदेश सरकारका आन्तरिक मामिला तथा कानुनमन्त्री ज्ञानेन्द्र यादवले संविधान संशोधनको मुद्दा यथावत रहेकोले खुशियालीका साथ संविधान दिवस मनाउने अवस्था नरहेकोले प्रभातफेरीमा आफूहरु सहभागी नभएको प्रतिक्रिया दिए ।

गणतन्त्र, संघीयताजस्ता केही महत्वपूर्ण उपलब्धिहरु प्राप्त भए पनि संविधान संशोधन नहुन्जेल खुशियालीको साथ दिवस मनाउन नसकिने उनको भनाइ छ ।

मधेश भवनमा दीपावली
प्रदेश सरकारका मन्त्रीहरु संविधान दिवसका कार्यक्रममा सहभागी नभए पनि ‘मधेश भवन’ मा भने दीपावली गरिएको छ ।

मुख्यमन्त्री तथा मन्त्रिपरिषद् कार्यालयसहित आवास क्षेत्रलाई प्रदेश सरकारले ‘मधेश भवन’ नामाकरण गरेको छ ।संविधान दिवसको अवसरमा प्रदेश सरकारले विहिबार साँझ ‘मधेश भवन’ मा दीपावली मनाएको हो ।

राजपाको विरोध प्रदर्शन
राष्ट्रिय जनता पार्टी (राजपा) नेपालले संविधानको विरोधमा जनकपुरसहित मधेशका जिल्लाहरुमा प्रदर्शन गरेको छ ।

आफ्नो माग बमोजिम संविधान संशोधन नभएको भन्दै राजपाले संविधान दिवसका दिन विरोध प्रदर्शन गरेको हो ।

जनकपुरमा राजपाले गरेको विरोध प्रदर्शनमा राजपा अध्यक्षमण्डलका सदस्य महन्त ठाकुरदेखि प्रदेश सरकारका मन्त्रीहरु समेत सहभागी थिए । विरोध जुलुसमा प्रदेश सरकारका भौतिक पूर्वाधारमन्त्री जितेन्द्र सोनल, राष्ट्रियसभा सदस्य वृषेशचन्द्र लाल, प्रदेशसभा सदस्य परमेश्वर साह, जनकपुरधाम उपमहानगरपालिकाका मेयर लालकिशोर साहलगायतका नेताहरुको सहभागिता थियो ।

जुलुसका सहभागीहरुले संविधान संशोधनको माग गर्दै सरकारविरुद्ध चर्को नाराबाजी गरेका थिए ।

मधेशी जनतामाथि गोली चलाएर जबरजस्ती जारी गरिएको संविधानको उत्सव आफूहरुले मनाउन नसक्ने राजपाका नेता एवं प्रदेश सरकारका भौतिक योजनामन्त्री सोनलले बताए ।

जनकचोकबाट निस्केको विरोध जुलुस रामचोक, शिवचोकलगायत नगरका विभित्र भागको परिक्रमा गरी पुनःजनकचोक पुगेर कोणसभामा परिणतभएको थियो ।