काठमाडौं- संविधान दिवसको अवसरमा राष्ट्रपति, उपराष्ट्रपति, प्रतिनिधि सभाका सभामुख, राष्ट्रिय सभाका अध्यक्ष तथा विविन्न दलका नेताहरुले शुभकामना दिएका छन् ।
सबैजसोले शुभकामनामा संविधानमार्फत प्राप्त उपलब्धी रक्षाका लागि एकजुट हुनु पर्नेमा जोड दिएका छन् ।
शुभकामना दिदैँ राष्ट्रपति विद्यादेवी भण्डारीले तीन तहका सरकार सञ्चालनमा आएसँगै संरचनाहरु संस्थागत सुदृढ हुँदै गएको बताएकी छिन् ।
संविधानमा सामाजिक न्यायमा आधारित समतामूलक समाजको परिकल्पनाअनुरुप समाजवादउन्मुख अर्थतन्त्रमा मुलुक अघि बढिरहेको सन्देशमा भनिएको छ ।
यस दिनले सबै नेपालीमा ‘समृद्ध नेपाल, सुखी नेपाली’को राष्ट्रिय सङ्कल्प मन, बचन र कर्मले समर्पित हुन प्रेरणा मिल्ने उनले विश्वास व्यक्त गरेकी छिन् । उनले संविधानको कार्यान्वयनमार्फत् नागरिकको हित र मुलुकको समृद्धि हुने गरी कार्य गर्न सबैमा अनुरोध गरेकी छिन् ।
यस्तै, उपराष्ट्रपति नन्दबहादुर पुनले सार्वभौम नेपाली जनताले आफ्नो संविधान आफैँ जारी गरेको ऐतिहासिक दिनका रुपमा यस दिनलाई सम्झिएका छन् ।
उनलेले सङ्घीय लोकतान्त्रिक गणतन्त्र, धर्मनिरपेक्षता, सामाजिक न्यायसहितको समानुपातिक समावेशी शासन व्यवस्थालगायत नेपाली जनताले प्राप्त गरेका उपलब्धि संस्थागत भएको दिनका अवसरमा सबै नेपालीमा बधाई दिएका छन् ।
जनताका जीवनमा परिवर्तन देखा पर्न थालेको भन्दै उले संविधान कार्यान्वयनका बाँकी कार्य यथाशीघ्र अगाडि बढ्ने विश्वास व्यक्त गरेका छन् ।
यस्तै प्रधानमन्त्री केपी शर्मा ओलीले संविधान दिवसका अवसरमा शुभकामना दिदैँ संविधानले जनताको आशालाई जगाएको दाबी गरेका छन् ।
सात दशक लामो पर्खाइ र प्रयत्नबाट संविधानसभामार्फत निर्माण भएको संविधानले नेपाली जनताको आकांक्षासँगै मान्यता र सिद्धान्तलाई समेत समेटेको शुभकामनामा उल्लेख छ ।
प्रधानमन्त्री ओलीले संविधानले सबै नागरिकलाई बिना भेदभाव मौलिक हक र स्वतन्त्रता सुननिश्चित गरेको बताउँदै संविधानले हरेक नेपालीको मर्यादालाई स्वीकार गरेको बताउँदै संविधान संशोधन आवश्यकताका आधारमा मात्र हुने बताएका छन् ।
त्यस्तै सभामुख कृष्णबहादुर महराले ‘संविधान दिवसको शुभकामना दिँदै असोज ३ लाई ऐतिहासिक दिन भनेका छन् । उनले युगान्तकारी परिवर्तनलाई संविधानमार्फत् संस्थागत गरिएको यस दिन नेपालीका लागि महत्वपूर्ण रहेको उल्लेख गरेका छन् ।
राष्ट्रियसभाका अध्यक्ष गणेशप्रसाद तिमिल्सिनाले भने संविधानको सफल कार्यान्वयन गर्दै मुलुकलाई एकताबद्ध गर्ने र राष्ट्रिय एकतालाई मजबुत पार्न सबै नेपालीलाई आह्वान गरेका छन् । शुभकामना दिदैँ उनले राष्ट्रिय अखण्डता कायम गर्दै समृद्ध राष्ट्र निर्माण गरी सुखी र खुशी नेपालीको विकसित नेपाल निर्माणका लागि आआफ्नो ठाउँबाट योगदान गर्नुपर्ने बताए ।
यसबाहेक विपक्षी दल नेपाली कांग्रेसका सभापति शेरबहादुर देउवालगायत विभिन्न दलका नेताहरुले संविधान दिवसको शुभकामना दिएका छन् ।
प्रकाशित: Dec 31, 2017| 18:23 आइतबार, पुस १६, २०७४