चितवन- जिल्लामा शनिबार राति भएका छुट्टाछुट्टै दुर्घटनामा दुईको ज्यान गएको छ ।
जिल्ला प्रहरी कार्यालयका अनुसार ज्यान गुमाउनेमा राप्ती नगरपालिका-६ का २५ वर्षीय सरोज तामाङ र कालिका नगरपालिका-७ का २८ वर्षीय विकास श्रेष्ठ छन् ।
तामाङको ट्रकको ठक्करबाट र श्रेष्ठको ट्याक्टरको ठक्करबाट ज्यान गएको हो ।
नारायणगढबाट वीरगन्जतर्फ आउँदै गरेको ना१२प ४९०२ नम्बरको मोटरसाइकलमा सवार तामाङलाई विपरीत दिशाबाट आउँदै गरेको युपी२१सीएन ३१८८ जी नम्बरको भारतीय ट्रकले ठक्कर दिएको थियो । ठक्करबाट घाइते बनेका मोटरसाइकल चालक तामाङको उपचारका क्रममा ज्यान गएको प्रहरीले जनाएको छ । सोही मोटरसाइकलमा सवार राप्ती नगरपालिका-१ का १४ वर्षीय उत्सव श्रेष्ठ घाइते छन् । उनको पुरानो मेडिकल कलेजमा उपचार भइरहेको छ र अवस्था मध्यम रहेको प्रहरीले जनाएको छ ।
यस्तै, कालिका नगरपालिका-७, स्थित क्लबचोकबाट जुटपानीतर्फ आउँदै गरेको ना४१प ९८४९ नम्बरको मोटरसाइकलमा सवार श्रेष्ठलाई विपरीत दिशाबाट आउँदै गरेको ना३त १३३५ नम्बरको ट्र्याक्टरले ठक्कर दिएको थियो । ठक्करबाट घाइते श्रेष्ठको पनि उपचारका क्रममा चितवन मेडिकल कलेजमा ज्यान गएको प्रहरीले जनाएको छ । सोही दुर्घटनामा मोटरसाइकलमा सवार सोही स्थान बस्ने ३० वर्षीय मुकेश पौडेल घाइते छन् । प्रहरीका अनुसार उनको अवस्था खतरामुक्त छ ।
दुवै दुर्घटनामा संलग्न सवारी साधन र चालकलाई नियन्त्रणमा लिएको प्रहरीले जनाएको छ ।
प्रकाशित: Dec 31, 2017| 18:23 आइतबार, पुस १६, २०७४