धनगढी - सुदूरपश्चिम प्रदेशका पाँच जिल्लामा २४ जनामा डेंगु रोगको सङ्क्रमण देखिएको पुष्टि गरिएको छ। सुदूरपश्चिम स्वास्थ्य निर्देशनालय दिपायलका अनुसार कैलालीमा १५, दार्चुलामा पाँच अछाममा दुई, कञ्चनपुरमा एक र डोटीमा एक जनामा सो रोग भेटिएको हो।
उक्त रोगको सङ्क्रमणले डोटीमा एकको मृत्यु भइसकेको छ। दिपायल सिलगढी नगरपालिका–६ थाप्लाका छत्र मलासी ‘छाया’ को उक्त रोगले कैलालीमा उपचारका क्रममा मृत्यु भएको हो। डोटीमा डेंगुका बिरामीलाई उपचारार्थ काठमाडौं लगिएको जिल्ला अस्पताल डोटीका डा. गिरिष अवस्थीले बताए।
डेंगु नियन्त्रण गर्न सुदूरपश्चिम प्रदेश सरकारले पाँच जिल्लामा अभियान नै सञ्चालनको तयारी गरेको सुदूरपश्चिम प्रदेश सरकारका सामाजिक विकासमन्त्री कृष्णराज सुवेदीले जानकारी दिए। बिहान र साँझमा डेंगु फैलाउने लामखुट्टेले टोक्ने भएकाले त्यति बेला सावधानी अपनाउन जिल्ला अस्पताल डोटीका निमित्त मेडिकल सुपरिटेन्डेन्ट डा. भूषण मिश्रले सुझाव दिए।
प्रकाशित: Dec 31, 2017| 18:23 आइतबार, पुस १६, २०७४