जनकपुरधाम – जिल्ला अदालतमा कार्यरत एक चालक घुससहित पक्राउ परेका छन्। अख्तियार दुरुपयोग अनुसन्धान आयोगको टोलीले जिल्ला अदालतमा कार्यरत चालक ब्रिजमोहन यादवलाई १ लाख १० हजार घुससहित पक्राउ गरेको हो।
पक्राउ परेका यादव जिल्ला अदालत सिरहाका ३ नम्बर इजलाशका न्यायाधीश नरनारायण पौडेलका सवारी चालक रहेको बताइएको छ। सदरमुकाम सिरहाको खड्ग होटलबाट एकजना सेवाग्राहीसँग घुस लिइरहेको अवस्थामा अख्तियारको बर्दिवास कार्यालयबाट खटेको टोलीले चालक यादवलाई पक्राउ गरेको हो।
अदालतमा विचाराधीन रहेको लागुऔषधसम्बन्धी मुद्दा मिलाइदिने भन्दै घुस लिइरहेको अवस्थामा अख्तियारको टोलीले यादवलाई पक्राउ गरेको अख्तियार स्रोतले जनाएको छ।
प्रकाशित: Dec 31, 2017| 18:23 आइतबार, पुस १६, २०७४