चन्द्रयान-२ : आज राति चन्द्रमाको सतहमा ओरालिँदै

काठमाडौं- चन्द्रमाबाट ३५ किमि टाढाको कक्षमा घुमिरहेको चन्द्रयान-२ आज राति चन्द्रमाको दक्षिण ध्रुवमा ओरालिँदैछ । 

भारतीय अन्तरिक्ष अनुसन्धान संस्थान (इरो)का अनुसार चन्द्रयान-२ ले भारतीय समयअनुसार आज राति १ः३० देखि २ः३० को बीचमा चन्द्रमाको सतहमा ओरालिनेछ ।  

चन्द्रमामा ‘सफ्ट ल्याण्डिङ’ सफल भए भारत यो उपलब्धि हासिल गर्ने चौथो देश बन्नेछ । यसअघि अमेरिका, रुस र चीनले चन्द्रमामा आफ्ना यान ओरालिसकेका छन् । 

यस्तै, भारत चन्द्रमाको दक्षिणी ध्रुवमा यान ओराल्ने पहिलो देश बन्नेछ । 

इसरोका वैज्ञानिकले ‘ल्याण्डिङ’को तयारीलाई अन्तिम रूप दिन जुटिरहेको बताएका छन् । 

चन्द्रयान–२ यही वर्षको जुलाई २२ मा प्रक्षेपण गरिएको थियो । 

उक्त अभियानका लागि ९७८ करोड रूपैयाँ लागत लागेको इसरोले जनाएको छ । 

भारतले यसअघि भारतले सन् २००८ अक्टुवर २२ मा चन्द्रयान–१ प्रक्षेपण गरे पनि सफल ‘ल्याण्डिङ’ गर्न सकेको थिएन ।

(एजेन्सीको सहयोगमा)